Xildhibaan lagu dilay weerarkii Hotel Naaso-hablood Muqdishu
-
- Posted On 26-06-2016, 01:55PM
MUQDISHU, Somalia- Khasaaro xooggan ayaa ka dhashay weerar kooxda Al Shabaab galinkii dambe ee Shalay ay ku qaadeen hotel Naaso-hablood ee magaalada Muqdishu,w axaana ku geeriyooday in kabadan 15 qof.
Dadka dhintay, waxaa kamid ahaa Xildhibaan AHN Burci Maxamed Xamse, waxaana geeridiisa xaqiijiyay wasiirka wasaaradda Arrimaha dibadda dowladda Federalka Soomaaliya Cabdisalaam Hadliye oo qoraal kooban soo dhigay bartiisa Twitterka.
AHN Burci wuxuu xubin ka ahaa Baarlamaanka Soomaaliya, Sidoo kale wuxuu horay u soo noqday Wasiiru dowlaha Arrimaha dibada, wuxuuna kamid noqonayaa labo Xildhibaan oo isla bishan gudaheeda lagu dilay Muqdishu kuwaasi oo ku dhintay weerarka Ambasador.
Weerarka oo qaraxyo loo adeegsada ayaa waxaa ku dhaawacmay in kabadan 20 qof.
Wasiirka Amniga Gudaha Cabdirisaaq Cumar Maxamed ayaa sheegay in dableyda hubeysan ee gashay Hotelka ay ahaayeen saddex ruux iyo nin watay gaari oo isku qarxiyay banaanka hotelka kaasoo baabuur watay.
Waxaa uu sheegay in aanay jirin dad gudaha Hotelka lagu dilay, isla markaana Ciidamada Ammaanka ay soo afjareen howl galka abaarihii afurka.
Dhinaca kale waxaa dhacdadaasi ka hadashay, Jamciyadda Quruumaha ka dhaxaysa iyadoo falkaasi ku tilmaamtay inay tahay wax laga xumaado weerarrada joogtada ah ee lala beegsanayo hotellada ku yaalla caasumadda Soomaaliya.
Ergayga gaarka ah ee Qaramada Midoobay u qaabilsan Soomaliya Michael Keating, ayaa qoraal uu soo dhigay bartiisa Twitterka wuxuu ku sheegay in weerarka ku dhinteen 20 qof oo ay ku jiraan 4 isku qoys kasoo jeeda, wuxuuna tacsi u diray dhammaan dadkii dhacadadaasi ku waxyeelloobay.
Weerarada Hotellada Muqdishu, ayaa soo noq noqday waxaana muuqata inaysan jirin nidaam dowladda Soomaliya ugu talo gashay in lagu ilaaliyo maadama dhammaan loo weeraray qaab isku mid ah.
GAROWEONLINE
