Xubno katirsan Al Shabaab oo Muqdishu lagu dilay

MUQDISHU, Somalia- Saddex dagaalyahan oo katirsanaa Kooxda Al shabaab ayaa lagu dilay dagaal culus oo xalay ka dhacay degmada Hiliwaa, ee waqooyiga magaalada caasumadda ah ee Muqdishu.

Dagaalka ayaa yimid markii  Al shabaab ay weerar kusoo qaadeen ciidamada Nabad sugidda xilli ay howlgal ka fulinayeen Xaafadda Suuqa Xoolaha, ee degmada Hiliwaa.

Maamulka gobolka Banaadir ayaa sheegay in ciidamada NISA ay ku dileen iska-caabinta weerarka  lagu soo qaadey ah Horjooge ka tirsan Al-shabaab oo u qaabilsanaa Degmadaasi Hiliwaa oo magaciisa lagu soo koobay Jacfar.

Dagaalka waxa uu ka dhacay Warshadii hore ee Barafuunka, oo ku taalla Xaafada Suuqa Xoolaha.

Al shabaab wali kama aysan hadlin dagaalka Suuqa Xoolaha ka dhacay, iyo warka kasoo baxay mamaulka gobolka Banaadir, oo ku saabsan Dilka Amiirkooda Jacfar iyo dagaalamayaasha kale oo ku dhintay iska caabintaas.

Xaafadaha ku yaalla waqooyiga Muqdishu, gaar ahaan Deyniile iyo Hiliwaa ayaa inta badan waxaa ka dhacay weeraro Al shabaab ku qaadaan saldhigyada ciidamada dowladda Soomaaliya iyo Dilal qorsheysan.

GAROWEONLINE