Al-Shabaab oo qalaafatay wiil la dhashay mas'uul dowladeed
-
WARIYAHA NAIROBI GAROWE ONLINE
- Posted On 23-02-2020, 07:00PM
NAIROBI, Kenya – Dagaalameyaasha hubeysan ee Al-Shabaab ayaa Waqooyi-Barri ee dalka Kenya ku qafaashay wiil la dhashay mas'uul dowladeed, sidda uu shaaca ka qaadey Taliska Booliska.
Daa'uud Bashiir Guure ayaa la tilmaamay in lagala baxay hoygooda oo ku yaala Garissa, gaar ahaan nawaaxiga xadka ay wadaagaan dalalka deriska ah ee Soomaaliya iyo Kenya.
Warbixinta booliska ayaa intaas ku dartay in dableyda afduubatay Guure ay tiradoodey gaareysay 20 qof.
Falkaan ayaa wuxuu dhacay Jimcadii lasoo dhaafay, sidda ay warbaahinta kasoo xigtay dadka degaanka.
Wararka ayaa intaas ku daraya in Guure lala soo aadey dhanka Soomaaliya, wallow aan la ogayn halka lagu hayo.
Saxaafadda Kenya ayaa baahisay in Guure ay Al-Shabaab kaga shakisay in uu bixiyey xog maleeyshiyaadka ku saabsan.
Inta badan xoogaga gacansaarka la leh shabakadda Al-Qaacida ayaa dhacdooyin noocaan ah ka fuliya gudaha Kenya, waxaana ay qaarkood ku qaataan madax-furasho, halka kuwa kale ay dilaan.
GAROWE ONLINE
