Covid-19: Cabasho laga muujiyey hanaanka karantiilka Kenya

NAIROBI, Kenya – Dad ku sugan Kenya ayaa sheegaya in loola dhaqmay si ka baxsan bini'aadanimada xili ay ku jiraan muda huuriska Coronavirus, sidda ay ku warantay BBC-da qeybteeda aduunyada la hadasha.

Sidda ku xusan warbixinta, in ka badan laba kun oo dad ah kuwaas oo isugu jira muwaadiniin iyo ajaaniib ayaa lagu amray in ay ku negaadaan hoteelada iyo xarumo dowladeed markii ay galeen dalkaas.

Hadda, maadaama xarumaha laga xaqiijiyey kiisas, mudada karan-tiilka oo ahayd 14-maalin ayaa laga dhigay muddo hal bil ah.

Xili ay is-waydiinayaan sababta loo kordhin go'doominta, qaar kamid ah dadka waxay tibaaxeen in loola dhaqmay "sidda maxaabiista".

"Kuwa ayaa horey tabasho uga muujiyey in aan loo ogolaan waxyaabaha aas-aasiga ah sidda Saabuunta iyo Biyaha," ayay raacisay BBC-da.

Balse, wasiirka caafimaadka Mutahi Kagwe wuxuu ku eedeeyay dadka ay hareer-mareen shuruucda isla markaana ay wada caweynayaan, iyagoo go'doominta ku jira, "taas oo ah wax aan la aqbali karin".

Guud ahaan waddanka Kenya, kiisaska cudurka ee la xaqiijiyey ayaa ka badan 130, iyaddoo uu ku jiro qof Soomaaliyeed. Tirada dhimashadda waxaa lasoo wariyey in ay gaartay saddex, dhamaantooda waa muwaadiniin.

GAROWE ONLINE