Dowladda Kenya oo ku fekereysa in ay xirto xuduudka Soomaaliya

NAIROBI, Kenya – Dowlada Kenya ayaa ku fekereysa in ay gebi ahaanto xirto xuduudka ay la wadaagto Soomaaliya, sida uu Jimcadii ka dhawaajiyey Wasiirka Caafimaadka wadankaas, Mutahi Kagwe.

Kagwe oo wariyeyaasha kula hadlay caasimadda Nairobi ayaa carabka ku dhuftay in go'aankaas ay "u badan tahay in ay qaataan".

Sidda laga soo xigtay wasiirka, sohdinta la xirayo waa dhinaca Wajeer, wallow uusan tilmaamay goorta lagu dhawaaqayo go'aankaas.

Talaabadan ayaa qayb ka ah xayiraadyo cusub oo dowladda Uhuru Kenyatta qorsheyneyso in ay soo rogto si looga hortaggo safmarka Coronavirus, kaas oo kiisas badan laga helay labadda dal.

"Xadka laga soo gudbo Wajeer iyo Soomaaliya, oo laga helay in ka badan 500 kiis oo ah Coronavirus, waxay u badan tahay in aan xirno si loo xaqiijiyo in uusan faafin fayruska," ayuu yiri.

Todobaadkii hore ayay ahayd markii dhowr qof oo la sheegay in ay la yimaadeen Soomaaliya loogu karantiilay Wajeer Covid-19 awadiisa. Maalmo kadib, waxaa lasoo wariyey in kiiskii ugu horeeyay la helay.

Dowladda Federaalka ah ee Soomaaliya ayaa horey u xirtay dhamaan sohdimaha uu waddanku la leeyahay deriska, hase ahaatee, waxaa lasoo warinayaa in aysan si buuxda u dhaqan-gelin talaabooyinkaas.

GAROWE ONLINE