Dowladda oo ka aamusan Soomaalida "lagu laynayo" Koonfur Afrika

Dhacdadii 3aad ee lagu beegsanayo ganacsatada Soomaaliyeed asbuucaan guddihiisa ayaa lasoo wariyey shalay.

CAPTE TOWN, South Africa – Kooxo burcad ah Koofur Afrikaan ah ayaa goor dambe oo Talaadadii ah ku toogtay labo nin oo ganacsato Soomaaliyeed ah gagaarka Goobo Ganacsi oo ku yaalla Xaafada Kalija ee magaalada Cape Town ee Koofurta dalkaasi.

Yaasin Cumar iyo Yuusuf Jowhar ayaa la dilay kadib markii burcad hubeysan ay si gaar ah ugu beegsadeen goobahooda ganacsi goobjoogayaal ayaa u sheegay Warsidaha Garowe Online.

Eedeysanayaasha ayaa waxaa u suurtagashay in ay baxsadaan ka dib markii ay dileen labada wiil ee Soomaalida ah sida ay sheegeen dadka deegaanka.

Sida ay sheegeen asxaabta iyo qoyska, dhalinyaro kale ayaa ku dhaawacmay rasaasta inta ay dhacdu socotay, waxaana loo qaaday isbitaalka si loogu dabiibo.

Waa dhacdadii 3aad ee lagu beegsanayo ganacsatada Soomaaliyeed asbuucaan guddihiisa. Booliska dalka Koonfur Afrika ayaa sheegay in ay wadaan baaritaano ku aadan falka dilka ah ee dhacay.

Guddoomiyaha urur ay ku mideysan yihiin bulshada Soomaaliyeed, Caamir Sheekh, ayaa cambaareeyay weerarkii khasaaraha badan dhaliyay ee burcad hubeysan ay ku qaadeen ganacsato Soomaaliyeed.

Waxa uu intaasi ku daray in wax laga xumaado ay tahay in tuugta ay beegsadaan muwaadiniinta Soomaaliyeed, isla markaana maamulka deegaanka aysan ka hadlin arrintaasi.

Dowladda federaalka ah ee Soomaaliya ayaan wali ka hadlin beegsiga tusbaxa afka furtey noqdey ee maalmihii lasoo dhaafay lagu hayo ganacsatada Soomaaliyeed ee Koonfur Afrika.

Soomaali badan oo nolol  ka wanaagsan mida dalkooda u raadsaday Koofur Afrika ayaa si joogto ah ula kulma weeraro iskugu jira dil, dhawaac iyo dhac aan loo aaba yeellin halka maamulada deegaankana ay ku guuldaraysteen in ay wax ka qabtaan dhibaatada lagu haayo soo galootiga.

GAROWE ONLINE