Gargaarkii ugu horeeyay oo gaarey Tigray kadib heshiiska nabada
-
WARIYAHA ADDIS ABABA GAROWE ONLINE
- Posted On 16-11-2022, 04:14AM
ADDIS ABABA, Ethiopia - Labo baabuur oo sida sahay caafimaad ayaa Talaadadii gaaray gobolka Tigray ee dalka Itoobiya, waana shixnadihii ugu horreeyay ee gargaar caalami ah oo la soo dajiyo gobolkaas.
Talaabadan ayaa kusoo beegmaysa ka gadaal markii dowladda federaalka ah ee Itoobiya iyo ciidamada ismaamulka Tigreegu ay ku heshiiyeen xabbad-joojin horraantii bishan.
Kolonyada ay wateen Guddiga Caalamiga ah ee Laanqeyrta Cas ama ICRC waxay gaarsiiyeen 40 tan oo "alaabta muhiimka ah, daawooyinka degdega ah iyo qalabka qalliinka" ee Mekelle, ee xarunta gobolka Tigray.
ICRC ayaa talaabadan waxay ku xaqiijisay war-saxaafadeed ay soo saartey. Inta la ogyahay, ma jirin wax gargaar caalami ah oo dhanka Tigray galay tan iyo dabayaaqadii Ogosto.
Xayiraadaha dhanka gargaarka bini'aadantinimo tan iyo markii ay dagaaladu qarxeen Noofambar 2020 ayaa waxa ay sababeen masiibo bini'aadantinimo oo aad u daran guud ahaan gobolka.
Sidda ay sheegeen hay'adaha u dooda xuquuqda aadanaha Qaramada Midoobay iyo kuwa maxaliga ah, tani ayaa saameysay malaayiin u baahnaa cunto iyo daawo degdeg ah.
Shuruudaha heshiiska xabbad-joojinta - oo ka dhacay Koonfur Afrika horraantii bishan - waxaa ku jiray dawladda federaalka Itoobiya inay fududayso gelitaanka bini'aadantinimo ee Tigrayga iyo soo celinta isgaarsiinta.
GAROWE ONLINE
