Kenya oo lagu cadaadinayo qorshe ku aadan dhakhaatiir ay Shabaab haysato

NAIROBI, Kenya – Cuba ayaa "ku cadaadineysa" Kenya in ay ogolaato lacag madax furasho ah oo laga bixiyo dhakhaatiir ay Al-Shabaab afduubatay.

Assel Herrera iyo Landy Rodríguez ayaa ku dhawaad hal sano ku jira gacanta maleeyshiyaadka gacansaarka la leh shabakada Al-Qaacida.

Warbaahinta maxaliga ah ayaa ku warameysa in xukuumada Havana ay ku adkeyneyso in ay dib u hesho muwaadiniinteeda.

Mas'uuliyiinta labada dhinac ayaa la sheegay in ay fadhiyo badan ka yeesheen arrintaas, balse aanan wali wax is-afgarad ah laga gaarin.

Kulankii u dambeeyay waxaa yeeshay afhayeenka Aqalka Sare ee Kenya iyo safiirka Cuba u fadhiya magaaladda Nairobi, Ernesto Gómez Díaz.

Dowladda Uhuru Kenyatta oo ku adkeysatay in aysan magdhow bixin doonin ayaa ku goodisay in ay awood ku maquunin doonto Al-Shabaab.

Sikastaba ha ahaatee, dhakhaatiirta ayaa la tilmaamay in lagu haysto koonfurta Soomaaliya, isla markaana ay waqti xaadirkaan badqabaan nool yihiinna.

GAROWE ONLINE