Niger oo laashay iskaashiga milatari kala dhaxeeyay Mareykanka

Go'aankan ayaa imaanaya xilli Washington ay horey u hakisay kaalmadii ay siin jiray dowladda Niger.

NAIROBI, Kenya - Dowladda Niger ayaa ku dhawaaqday in go'aan "si degdeg ah" ku dhaqan-galaya ay uga baxdey heshiiskii iskaashiga milatari ee ay la gashay Mareykanka.

Bayaanka ayaa lagu sheegay in dowladdu ay go’aansatay inay si degdeg ah u cambaareyso heshiiska la xiriira ciidamada Mareykanka iyo shaqaalaha rayidka ah ee Waaxda Difaaca Mareykanka ee gudaha Niger.

War-saxaafadeedkan ayaa waxaa fiidnimadii Sabtida laga akhriyay telefishanka qaranka ee Niger kaas oo ay gacanta ku dhigeen ciidamadda awooda milatari kula wareegay xukunka.

Maraykanka ayaa weli ku sugan dalka Niger waxaana ka joogga ilaa 1,000 askari oo ku sugan saldhig ciidan oo lagu waramay in lagu dhisay 100 milyan oo dollar.

Dhaqdhaqaaqyada halkaas ka jira ayaa xaddidnaa ilaa Julaay 2023 kadib markii uu dhacay afgambi ciidan ee waddankaas iyadda oo Washington ay hakisay kaalmada dowladda.

GAROWE ONLINE