Ra'iisul wasaaraha Suudaan oo isku day dil ka badbaadey
-
WARIYAHA ARRIMAHA CAALAMKA GAROWE ONLINE
- Posted On 09-03-2020, 02:07PM
KHARTUUM, Sudan – Ra'iisul wasaaraha Suudaan, Cabdalla Xamduuk, ayaa maanta oo Isniin ah wuxuu magaalada caasimada ah ee Khartuum uu ka badbaadey isku day dil, sidda ay baahisay warbaahinta dowladda.
"Qaraxa wuxuu haleelay gaariga ra'iisul wasaare Cabdalla Xamduuk oo socda, balse ALLE ayaa ku mahadsan ma uusan ku dhaawacmin," sidaas waxaa yiri Ali Bakhit, agaasimaha warfaafinta xafiiska ra'iisul wasaaraha.
Ma jirto koox illaa iyo haatan dusha saaratay mas'uuliyadda falkaan. Si lamid ah, ma cadda qaabka loosoo abaabulay weerarka.
Sawirro laga soo qaadey meesha ay wax ka dhaceen ayaa muujiyey burbur xoogan oo soo gaaray gaariga la beegsaday.
Xamduuk, oo ah dhaqaaleyahan caan ah, ayaa jagada ra'iisul wasaaraha loo magacaabay bishii August ee sanadkii lasoo dhaafay kadib banaanbax isbedel doon ah oo xilka looga tuuray Cumar Xasan Al-Bashiir.
Kadib markii uu xafiiska la wareegay wuxuu balanqaadey in uu wax badan ka qaban doono xaaladaha dhibaato dhaqaale ee ka jira waddankaas. Muddo ku suntay 30-sano ayuu haystaa waaya-aragnimo dhanka dhaqaalaha ah.
GAROWE ONLINE
