Walaalaha madaxwaynihii la afgambiyay ee Sudan oo la xiray

KHARTUUM, Sudan – Milatariga Suudaan ayaa ku waramaya in ay xireen laba kamid ah walaalaha madaxwayne Cumar Xasan Al Bashiir.

Afhayeen u hadlay ciidanka ayaa sheegaya in tani ay qayb ka tahay ol'olaha xididaha loogu siibayo calaamadaha hogaankii hore.

Mas'uulka ayaa intaasi raaciyay in xubnaha kamida xisbul xaakimkii hore ay ku jiraan gacanta sharciga qaar kalena lagu daba jiro.

Talaabadaan ayaa kusoo aadeysa iyada oo xabsi la dhigay Al Bashiir oo xukunka laga afgambiyay todobaadkii hore.

Sidda ay xaqiijiyeen qoyskiisa, xabsiga la dhigay Al Bashiir ayaa ah midka uu isaga ku xiri jiray dadka kasoo horjeeda mudadii uu talada hayey.

Dibad-baxyadda ayaa sii socda iyada oo dadka ay su'aalo ka keeneen xaqiiqo ahaanshiyaha warka ku aadan in la xiray Cumar Al Bashiir.

Warbaahinta reer Galbeedka ayaa baahineysa in dadka ay codsanayaa in milatarigu cadeeyo arrinkaan uuna soo bandhigo muuqaalka Bashiir.

GAROWE ONLINE