Wasiirada degaanka Soomaalida oo ka shiray masiirka ciidankii ONLF

JIGJIGA, Soomaali Galbeed – Golaha Wasiirada degaanka Soomaalida ayaa maanta oo Jimce ah fadhi ku yeeshay xaruntooda caasimada maamulka ee Jigjiga.

Shirka oo socday saacado ayna kasoo qaybgaleen inta badan xubnaha xukuumada ayaa waxaa gudoomiyay madaxwayne ku xigeenka degaanka, Aadan Faarax.

Ajendaha isu imaatinka looga hadlay ayaa waxaa kamid ahaa mustaqbalka ciidankii ONLF iyo bayaankii kasoo baxay shirka xisbiga talada haya.

Ugu horeyn, wasiirada ayaa cod aqlabiyad leh ku ansixiyay qodobadii kasoo baxay shirwaynihii xisbul xaakimka ee ka koobnaa 27-da qodob.

Sidda laga soo xigtay illo ku dhow kulanka, waxaa la isku raacay in ciidankii jabhadda ONLF la siiyo tababar dheeraad ah iyo waxbarasho madani ah  loona sameeyo saldhigyo gaar ah.

Tan iyo bishii November oo ay dib ugu laabteen Jigjiga, ciidankii ONLF oo ay dowladdu la wareegtay ayaa ku jira xero ciidan oo ku taala duleedka magaaladda.

Dib u soo laabashada ciidankii iyo hogaanka ONLF oo haatan qaar kamida degaanka ku sugan yahay ayaa timid kadib heshiis nabadeed oo ay kala saxiixdeen Itoobiya iyo ururka.

Heshiiska oo fahfaahintiisa aan lala wadaagin war-fidiyeenka waxaa kamid ah in magdhow la siiyo qoysaska ay kasoo jeedaan askarii ka dhimatay ONLF intii ay halganka ku jirtay iyo in la daryeelo "halyeeyadii" jabhadda.

ONLF oo haatan loo rogay xisbi ayaa lagu wadaa in magaalada Khabri-dahar ay dabayaaqada bishaan ku qabato shirkii ugu horeeyay, kaasi oo ay isugu diyaarineyso doorashada kusoo food-leh gobolka sanadka 2020-21.

GAROWE ONLINE