William Ruto oo dowladiisa jago cusub uga dhiibay Uhuru Kenyatta

Hadal-jeedintiisa ugu horeysay kadib markii la dhaariyey ayuu ku fahfaahiyey waajibaadkan cusub.

NAIROBI, Kenya - Madaxweyne William Ruto ayaa wuxuu u wakiishay madaxwaynihii hore ee Kenya Uhuru Kenyatta inuu mas’uul ka noqdo dadaallada nabadeed ee ay Kenya ka waddo guud ahaan gobolka.

Ruto oo khudbadiisii ​​ugu horeysay u jeediyay shacabka kadib markii loo dhaariyay xilka madaxtinimo ayaa tilmaamay in Mr. Kenyatta uu qabtay shaqo lagu ammaani karo oo ku aadan dadaallada nabadda, gaar ahaan Itoobiya iyo gobolka harooyinka waaweyn oo ka kooban Jamhuuriyadda Dimuqraadiga ah ee Congo. (D.R.C.), Burundi, Rwanda, iyo Uganda.

Sidda laga soo xigtey Ruto oo hadal-jeedintiisa ku muujiyey in uusan isbadal ku imaan doonin siyaasada Kenya ee arrimaha dibadda, Uhuru Kenyatta ayaa ogolaadey in uu sii waddo shaqadaas.

"Dadaaladda nabadeed ee ka socda deegaankeena oo ay ka mid yihiin Itoobiya iyo gobolka harooyinka waaweyn, waxaan ka codsaday walaalkay iga weyn Madaxweyne Uhuru Kenyatta oo la soo shaqeeyay gobolladaas in uu sii wado," ayuu yiri.

Wuxuu hadalkiisa intaas kusii daray: "Waxaan uga mahadcelinayaa in uu si sharaf leh u aqbalay inuu sii hoggaamiyo wadahadalladaas isagoo ku hadlaya matalaya dadka deegaanka Kenya".

Ruto oo noqdey madaxwaynihii shanaad ee Jamhuuriyadda Kenya ayaa xaqiijiyay in maamulkiisu uu taageeri doono dadaallada nabadeed ee uu guddoomin doono Kenyatta.

“Waxaan u ballanqaaday in dowladda Kenya iyo gaar ahaan nafteyda ay taageereyso hindisayaasha uu garwadeenka ka yahay madaxweyne Uhuru Kenyatta, waxaana rabaa in aan uga mahadnaqano," ayuu tibaaxay.

GAROWE ONLINE