Dhowr arrimood oo aadan ka ogayn heshiiska Masar iyo Soomaaliya

Heshiiskan waxaa qeyb ka ah kor u qaadista iskaashiga militariga iyo amniga.

NAIROBI, Kenya - Khabiir dhanka amniga qaranka una dhashay Masar ayaa waxa uu wargeyska The New Arab u sheegay in dhaqdhaqaaqyada xukuumadda Qaahira ee Geeska Afrika ay yihiin kuwo “hordhac ah”.

Major General Mohamed Abdel Wahed ayaa sheegay in ku talagalka uu yahay "in lagu ilaaliyo ammaanka qaranka Masar ee gobolka istaraatiijiga ah ee wajahaya khataro badan oo dhanka ammaanka ah".

Khataraha ayuu ku qeexay gooni-isu-taagga, dambiyada xudduudaha isaga gudba, tartanka caalamiga ah, iyo xiisadda ka jirta badda cas ee koonfurta, "taas oo si toos ah u saamaysa kanaalka Suweys," ayuu raaciyay.

Hadalka ayaa imaanaya xilli Masar ay heshiis dhanka gaashaandhiga la gashay Soomaaliya xilli ay jirto xiisad diblumaasiyadeed oo kala dhaxeysa dalka dariska la ah ee Itoobiya.

Heshiiskan waxaa qeyb ka ah kor u qaadista iskaashiga militariga iyo amniga, dadaallada wadajirka ah ee difaaca, iskaashiga milatariga iyo sirdoonka, la dagaallanka argagixisada iyo dembiyada abaabulan, iyo sidoo kale wadaagista macluumaadka.

Marka laga soo tago qodobada kor ku xusan, waxaa heshiiska ka mid ah in la tababaro kaadirka Soomaaliyeed iyo ciidamada Soomaaliyeed si ay uga hortagaan khataraha la xiriira ilaalinta iyo difaaca dhulkooda.

Intaa waxaa dheer, "waxay Masar bixinaysaa tababaro si ay ula dagaalamaan argagixisada, gaar ahaan marka la eego dhaqdhaqaaqa sii kordhaya ee dhaqdhaqaaqa Al-Shabab", ayuu Abdel Wahed u sheegay The New Arab.

Soomaaliya waxaa soo wajahay khataro dhowr ah oo dhanka ammaanka ah, oo ay ugu weyn tahay  Al-Shabaab, oo lagu tilmaamo urur argagixiso, kuwaas oo dhaqdhaqaaqooda ay waayadan dambe sii xoogeysanayeen.

Ciidamada Soomaaliya ma awoodaan in ay iskood uga adkaadaan, taas oo qasabtay in ay joogaan howlgalka Afrikaan ah si ay u taageeraan xasilloonida dalka muddo 18 sano ah, taas oo ciidamada Itoobiya ay mar walba ku lahaayeen kaalin muuqata.

Muqdisho ayaa u gudbisay Golaha Nabadda iyo Ammaanka Afrika qoraal ku saabsan sameynta howlgal cusub oo Afrikaan ah si uu u guuleysto midka hadda jira, maadaama howshiisa uu dhammaanayo dhamaadka sanadkan.

Talaabadan ayaa waxay dadka wax indha indheeya ay ku macneeyeen in Muqdisho ay rabto in dalka laga saaro ciidamada Itoobiya, isla markaana loo gogol xaaro in ciidamada Masar iyo Jabuuti ay boosaskooda qabsadaan.

GAROWE ONLINE