Qorshaha cusub ee la doonayo in lagu xasiliyo caasimada Muqdisho
-
WARIYAHA MUQDISHO GAROWE ONLINE
- Posted On 08-04-2023, 07:04AM
MUQDISHO, Soomaaliya - Madaxweynaha Soomaaliya, Xasan Sheekh Maxamuud, ayaa Jimcihii ku dhawaaqay in dowladdiisa ay mamnuucday in hubka lagu dhex wato waddooyinka magaalada caasimadda ah ee Muqdisho.
Qaar ka mid ah khubarada dhinaca ammaanka ayaa tallaabadan u arka qorshe weyn oo lagu soo celinayo xasilloonida magaalada oo aan jirin tan iyo burburkii taliskii milateriga ee Siyaad Barre 1991-kii.
"Tan iyo burburkii dowladdii Millateriga ahayd, ma jirin hal qorshe oo la isku halleyn karo oo wax ku ool ah oo dhanka ammaanka ah, kaasoo gacan ka geystay xasilloonida magaalada," ayuu yiri Jeneraal Maxamed Faarax Caliyow.
Caliyow oo la hadlay VOA-da ayaa intaas ku daray: "Hadda in hubka laga mamnuuco waddooyinka [magaaladda Muqdisho] waa astaan wanaagsan oo horay loo soo maray”
Khabiirka ayaa waxa uu kamid yahay saraakiisha ciidamada xoogga dalka Soomaaliyeed. Sidoo kale, waa alanqeeyaha arrimaha ammaanka oo fadhigiisu yahay magaalada Toronto.
Saacado ka hor inta aan lagu dhawaaqin joojinta hubka ayaa warbaahinta dowladda waxa ay sheegtay in wajigii labaad ee dagaalka ay dowladda kula jirto Al-Shabaab uu ka bilowday gobolka Hiiraan ee bartamaha Soomaaliya.
25-kii Maarso, Wasaaradda Warfaafinta Soomaaliya ayaa sheegtay in 3,000 oo ka tirsan Al-Shabaab lagu dilay howlgallada wajigii koowaad ee ciidamada intii u dhaxeysay Agoosto 2022 ilaa Janaayo 2023. Sidoo kale dowladda ayaa sheegtay in 70 magaalo iyo tuulooyin laga saaray Al-Shabaab. Shabaab.
Dhanka kale, kooxda ayaa sheegtay in wajigii koowaad ee howlgallada ciidamada dowladda Soomaaliya iyo dagaalyahannada deegaanka uu fashilmay. Ma jiro illaa iyo hadda ilo madax bannaan oo xaqiijinaya sheegashada labada dhinac, gaar ahaan tirada khasaaraha dagaalka.
La-taliyaha Amniga Qaranka ee Madaxweynaha Soomaaliya, ayaa sheegay in Jabuuti, Itoobiya iyo Kenya ay u dirayaan ciidamo cusub oo taageeraya ciidamada Soomaaliya ee dagaalka kula jira Al-Shabaab.
Xuseen Sheekh Cali oo wareysi siiyay laanta afka Soomaaliga ee VOA-da bishii Maarso aya caddeeyay in kaalinta ciidankan ay ku kooban tahay wajiga labaad ee howlgallada, balse lama oga xilliga ay imaanayaan ciidamadan.
GAROWE ONLINE
