Aqalka Cad oo shaaciyey in nooca xanuunka Trump laga helay

WASHINGTON - Aqalka Cad ayaa Khamiistii xaqiijiyey in madaxweynaha Mareykanka, Donald Trump, laga helay xanuunka loo yaqaan chronic venous insufficiency, oo ah xaalad caadi ah oo ku dhacda xididdada dhiigga, taasoo badanaa lagu arko dadka waayeelka ah.

Warkan ayaa yimid kadib markii walaac laga muujiyey Trump oo lagu arkay barar oo ka muuqda lugihiisa hoose iyo dhaawacyo yaryar oo gacanta ka muuqda.

Afhayeenka Aqalka Cad, Karoline Leavitt, ayaa sheegtay in xanuunka lagu arkay baaritaan caafimaad oo dhowaan la sameeyey.

“Tani waxay la xiriirtaa daal yar oo ku dhaca unugyada jilicsan, taasoo ka dhalata gacan qaad joogto ah iyo isticmaalka aspirin,” ayay Leavitt sheegtay, iyadoo intaa ku dartay in aspirin-ku yahay daawo uu Trump u isticmaalo kahortagga cudurrada wadnaha.

Chronic venous insufficiency waa xaalad caafimaad oo ka dhacda marka waalka xididdada dhiigga — kuwaas oo caawiya in dhiiggu ugu noqdo wadnaha — ay bilaabaan inay shaqada joojiyaan. Inkastoo ay keeni karto barar iyo raaxo-darro, khubaradu waxay sheegeen in ay tahay xaalad la maareyn karo.

Dr. Andrea Obi, oo ah dhakhtar qalliin oo ku takhasusay xididdada dhiigga kana tirsan Jaamacadda Michigan, ayaa sheegtay:

“Sababaha waa kuwo badan... Xaaladdani waa mid aad u badan marka qofku gaboobo. Daawaynta badanaa waxay ka kooban tahay xirashada surwaallo cadaadis ah (compression stockings), socodka joogtada ah, iyo mararka qaar qalliin fudud oo xididada aan shaqaynayn la xiro. Guud ahaan, waa xaalad caafimaad oo aan halis ahayn.”

Warbixintan caafimaad ayaa ah mid muhiim ah, maadaama Trump uu horey uga dhigay arrimaha caafimaadkiisa kuwo aan si buuxda loo ogaan. Aqalka Cad weli faahfaahin dheeri ah kama bixin qorshaha daaweyntiisa hadda, balse mas’uuliyiintu waxay carabka ku adkeeyeen in xaaladdani aysan khatar weyn ku ahayn caafimaadkiisa guud.

GAROWE ONLINE