Ciidamada Masar oo laayey dalxiiseyaal

14 September, 2015(GO)-Milatariga iyo Booliska dalka Masar ayaa 12 qof ku dilay lama dagaan ku yaalla galbeedka dalkaasi.

War ka soo baxay wasaaradda arrimaha gudaha Masar ayaa sheegeya in 12 qof oo ay ku jiraan dalxiisayaal u dhashay dalka Mexico si khalad ah loogu dilay hawlgal ka dhan ah mintidiinta oo milatariga iyo booliska waddankaasi fuliyeen.

Bayaan ka soo baxday wasaaradda ayaa lagu sheegay in dalxiisa-yaashu ay ku sugnaayeen dhul ka caagan in la galo iyagoo ku safrayey kolonyo baabuur ah.

Shilka aya yimi ka dib markii goobtaasi gaareen ciidamo isku dhafan oo baacsanayay kooxo mintidiin ah.

Sida laga soo xiganayo wasaaradda arimaha gudaha dalka Masar waxaa socda baaritaano ku aadan qaabka wax u dhaceen.

Lamadegaanka ku yaalla galbeedka dalkaasi ayaa caan ku ah dalxiisayaasha balse sidoo kale waa meel aad u soo jiidata kooxaha mintidka ah, waana halka laga galo xudduudda dheer ee dalkaasi uu la wadaago dalka Liibiya, halkaas oo hubka uu aad ugu badan yahay.

Shalay oo Axad ahayd ayaa kooxda dowladda Islaamiga ah ee dalka Masar waxa ay sheegtay in ay iska caabisay hawlgal milateri oo ka dhacay dhulkaasi saxaraha ah.

Ugu yaraan 21 askari ayaa halkaasi lagu dilay bishii Luulyo ee sanadkii tegay kaddib markii rag hubeysan ay weerar ku qaadeen goob ciidamada Masar u taalay jid-gooyo.

Dalka Masar waxa ku sugan kooxo sheegtay inay ka tirsanyihiin khilaafada Islaamka ee ISIS kuwaasi oo ka dagaalama qeybo ka mid ah Bariga dhexe

GAROWEONLINE.