Dalalka xubnaha ka ah ICC oo u codeeyey in xilka laga qaado Xeer-ilaaliye Karim Khan

Dalalka xubnaha ka ah Maxkamadda Dambiyada Caalamiga ah ee ICC ayaa u codeeyey in xilka laga qaado Xeer-ilaaliyaha guud ee maxkamadda, Karim Khan, sida ay sheegeen ilo diblomaasiyadeed.

Warbaahin kala duwan ayaa Jimcihii sheegtay in aqlabiyadda 125-ka dal ee xubnaha ka ah ICC ay taageereen xil-ka-qaadistiisa.

Go’aankan ayaa yimid ku dhowaad laba sano kaddib markii Karim Khan lagu soo oogay eedeymo la xiriira anshax-xumo galmo. Kooxdiisa qareennada ayaa ku doodaysa in kiiska loo siyaasadeeyey, isla markaana uu la xiriiro tallaabadii uu Khan ku dalbaday waaran lagu soo xirayo Ra’iisul Wasaaraha Israel Benjamin Netanyahu.

Khan, oo 56 jir ah, ayaa lagu eedeeyey inuu faraxumeeyey haweeney ay wada shaqeynayeen oo ahayd kaaliye ka tirsan xafiiskiisa. Haweeneyda eedeynta soo jeedisay, oo magaceeda lagu sheegay oo keliya “Sarah”, ayaa CNN u sheegtay in Khan uu si tartiib ah ugu sii kordhiyey taabashooyin aan habboonayn, iyadoo sidoo kale soo bandhigtay eedeymo kale oo ku saabsan dhacdooyin dhex maray.

Karim Khan ayaa si adag u beeniyey dhammaan eedeymaha loo jeediyey. Qareennadiisu waxay ku tilmaameen habraaca xil-ka-qaadista mid sharci-darro ah, aan caddaalad ahayn, isla markaana aan ku dhisnayn caddeymo ku filan.

ICC ayaa hore shaqada uga joojisay Khan, iyadoo go’aankaas lagu saleeyey warbixin baaritaan oo Qaramada Midoobay ah, talooyin ka yimid guddi khubaro garsoor ah iyo qoraallo loo gudbiyey hay’adaha kormeerka maxkamadda.

Khan ayaa hoggaaminayey baaritaanno la xiriira colaado kala duwan oo caalamka ka socda. Hase yeeshee, go’aankiisii 2024 ee uu ku dalbaday waarannada xarigga hoggaamiyeyaasha Israel, oo ay ku jireen Netanyahu iyo Wasiirkii Difaaca Yoav Gallant, ayaa dhaliyey cadaadis iyo mucaaradad xooggan.

Maamulka Madaxweyne Donald Trump ayaa hore cunaqabateyn ugu soo rogay Khan iyo shaqaale kale oo ICC ka tirsan, taas oo jawaab u ahayd tallaabooyinka maxkamaddu qaaday. Mareykanka ayaa sidoo kale kordhiyey cadaadiska uu saarayo ICC.

Madaxii hore ee siyaasadda arrimaha dibadda Midowga Yurub Josep Borrell ayaa isna ku dooday in kiiska Khan uu qayb ka yahay weerar siyaasadeed oo ballaaran oo lagu hayo ICC.

Xil-ka-qaadista Karim Khan waxay si toos ah u bilaabaysaa geeddi-socodka lagu dooranayo Xeer-ilaaliye cusub oo ICC ah, inkastoo aan la filayn in doorashadaasi dhacdo ka hor sanadka soo socda.

Si kastaba, xil-ka-qaadistiisu wax saameyn degdeg ah kuma yeelanayso waarannadii xarigga ee ICC ay 2024 u soo saartay Netanyahu iyo Gallant ee la xiriiray dambiyada ka dhanka ah aadanaha. Waarannadaas waxaa wax ka beddeli kara ama laali kara oo keliya garsoorayaasha ICC.

GAROWE ONLINE