Denmark oo soo saartay sharci lagu mamnuucayo gubida Qur’aanka

SAWIR HORE

COPENHAGEN, Denmark - Dawladda Denmark ayaa ku dhawaaqday inay Jimcihii soo bandhigayso sharci qabyo ah oo mamnuucaya in Qur'aanka kariimka ah lagu aflagaadeeyo "meel fagaare ah."

Sidaas waxa lagu sheegay war-saxaafadeed uu soo saaray wasiirka caddaaladda ee Denmark, Peter Hamilgaard, oo uu qoray wargayska maxaliga ah ee "Extra Bladet."

Hamilgaard ayaa sheegay in dawladdu ay soo saari doonto sharci mamnuucaya in si aan habboonayn loola dhaqmo walxaha muhiimka u ah diimaha, oo ay ku jiraan gubashada Quraanka.

"Qofkii guba kutubta diiniga ah waxaa lagu xukumayaa ilaa laba sano oo xarig ah," ayuu raaciyay.

Wasiirku waxa uu sheegay in aflagaadada loo geysanayo qur’aanka kariimka ahi ay wax u dhimayso danaha Denmark.

Hamilgaard ma sheegin wax faahfaahin ah oo ku saabsan habka loo qaatay sharciga qabyada ah iyo sida uu u dhaqan gali doono.

GAROWE ONLINE