Facebook oo go'aan ka qaatay Taliban iyo dadka taageera
-
WARIYAHA CAALAMKA GAROWE ONLINE
- Posted On 17-08-2021, 07:43AM
WASHINGTON, USA - Facebook ayaa waxay xaqiijisay inay u aragto kooxda Taliban inay tahay "urur argagixiso", sidaas darteedna waxay barteeda ka mamnuucday kooxda iyo dhammaan waxyaabaha taageeraya.
Shirkadda oo war-saxaafadeed rasmi ah soo saartey ayaa ka dhawaajisay in ay sameysay koox gaar ah kana kooban khubaro Afgaanistaan ah kuwaasoo dabagalaya isla markaana saaraya fariimahooda.
Facebook ayaa intaas waxay ku dartey in siyaasaddan ay khuseyso dhamaan apps-a kale ee gacansaarka ay la leeyihiin kuwaasoo kala ah; Instagram-ka iyo WhatsApp-ka.
Si kastaba ha ahaatee, waxaa jira warar sheegaya in Taalibaan ay adeegsaneyso Whatsapp si ay u sameyso xiriiro kala duwan si gaar ah shaqsiyaadka ay u aragto in ay muhiim u yihiin xukunkooda.
BBC -da ayaa warisay in shirkadda Facebook ay qorsheyneyso in ay tallaabo adag ka qaadi doonto haddii ay ka hesho akoonno lagu isticmaalayo app-ka kuwaasoo gacansaar dhow la leh kooxda hubeysan.
Goobaha baraha bulshada ee iska soo horjeeda Facebook-ga sida Twitter-ka iyo YouTube-ka ayaa iyagana isha lagu hayaa sida ay u maamulaan waxyaabaha lagu taageerayo falaagadda Taliban.
Taliban ayaa todobaadkan waxay 20-sano kadib la wareegtay nidaamka maamulka Afghanistan kadib markii ay dhacdey dowladdii Ashraf Ghani kuwaasoo gabi ahaanba isugu jira qaar baxsadey iyo kuwa is-dhiibay.
GAROWE ONLINE
