Google oo fulinaysa balanqaad ay sameysay sanad kahor

Balanqaadkan ayaa la xiriira macluumaadka gaarka ah ee shirkada ka hayso macaamiisheeda.

WASHINGTON, USA - Shirkada Google waxay tirtiri doontaa dhammaan xogta ay ka hayso goobaha ay isticmaaleyaashu booqdeen, sida ay shirkaddu sheegtay, sanad kadib markii ay ballan-qaaday in ay yareyneyso xogta gaarka ah ee ay kaydineyso.

Astaanta shirkadda ee “Timeline” – oo horay loogu yiqiin Location History – wali way u shaqeyn doontaa dadka doorta inay isticmaalaan, iyagoo awood u leh inay dib ugu raacaan taariikhda safaradooda muddo sanado ah si ay u hubiyaan halka ay joogeen wakhti cayiman.

Laakiin dhammaan xogta lagama maarmaan ah ee loo baahan yahay si astaantan ay u shaqeyso waxaa lagu kaydin doonaa gudaha, taleefannadooda ama tablet-yada isticmaalayaasha, iyadoo midkoodna uusan ku keydsanaan doonin server-yada shirkadda.

Email ay shirkadda Google u dirtay isticmaaleyaasha Maps, waxay sheegtay in isticmaaleyaashu haystaan ilaa 1-da December si ay u kaydiyaan dhammaan safarradii hore ka hor inta aan si toos ah loo tirtirin.

Isticmaaleyaasha ayaa wali awood u yeelan doona inay keydiyaan xogtooda haddii ay ka walwalsan yihiin in ay lumiyaan ama ay rabaan inay ku keydiyaan qalabyo kala duwan.

GAROWE ONLINE