Halkee ayuu maraya dagaalka Israa’iil & Falastiin?

QUDUS - Xaalada dadka ku sugan marinka ee Qaaa ayaa weli ah mid adag toban maalin ka dib markii uu bilowday dagaalka u dhaxeeya Israa’iil iyo kooxaha Falastiiniyiinta, iyadoo dagaalkan uu sababay dhimashada boqolaal qof oo labada dhinac ah, halka ay ku dhaawacmeen kumanaan kale.

Dagaalkan ayaa dhaliyay falcelinno kala duwan, waxaana ka hadlay hoggaamiyeyaasha caalamka oo uu ka mid yahay Ra'iisul wasaaraha Britain Rishi Sunak oo sheegay in lix muwaadin oo u dhashay dalkaas dilay weerarrada Xamaas, 10 kalena la la'yahay.

Dhanka kale, xoghayaha arrimaha dibadda ee Mareykanka Anthony Blinken ayaa ku dhawaaqay in Mareykanka uu taageersan yahay xaqa ay Israa'iil u leedahay in ay is difaacdo inta uu ku guda jiray booqashadiisa ee dalkaas.

Halka Madaxweynaha Maraykanka Joe Biden, uu dhankiisa ka digay in qabsashada Israel ee Qasa ay tahay "khalad weyn", Wasiirka Arrimaha Dibadda ee Iran Amir Abdollahian ayaana ku raacay arrintaas isaga uu ka digay in dagaalka uu wadamo kale ku fido.

Docda kale, waxaa weli socda wadahadallada ku saabsan furitaanka xadka Masar uu la wadaago Qasa si loo gaarsiiyo dadka marinka ku nool gargaarka, inkastoo aysan weli muuqan inay Israa’iiliyiintu aqbali doonaan.

Ugu yaraan 2,800 oo falastiiniyiin ah ayaa la dilay ilaa hadda, sida uu sheegay maamulka Qasa. Saddex meelood labo meel ayaa la rumeysan yahay inay yihiin haween iyo carruur, halka ku dhawaad ​​hal milyan oo qof ay ku barakaceen marinka, sida ay sheegeen hay’adaha gargaarka.

Dhanka kale, In ka badan 1,400 oo Israa’iiliyiin ah ayaa la dilay, waxaana maamulka Israa’iil ay sheegeen in Qasa lagu haysto 199 la haystayaal ah. Israa’iil ayaa ciidamadeeda ku wadda xuduudda marinka, si ay ugu diyaar garoobaan duulaan dhulka ah.

GAROWE ONLINE