Heshiis Xabad Joojin oo Gaza Lagu Dhow yahay In La Gaaro

QAAHIRA - Waxaa soo baxay warar muujinaya in heshiis ku saabsan xabbad joojin laga hirgaliyo Gaza, kaas oo sidoo kale horseedi doona sii deynta la haystayaasha Israel. Inkasta oo wadahadaladu muddo dheer hakad ku jireen, dhinacyada Israel iyo Xamaas ayaa muujiyay rajo ku aaddan in heshiis laga gaaro arrintan kadib wadaxaajoodyo culus oo la sameeyay.

Ilo xog ogaal ah oo ku dhow kulamada la xiriira heshiiska ayaa sheegay in xabbad joojintu ay socon doonto muddo 60 maalmood ah, inkastoo aysan jiri doonin ciidanka Israel ay si buuxda uga baxaan Gaza. Ciidamada Israel ayaa la filayaa inay ka baxaan xarumaha magaalooyinka Gaza iyo wadada xeebta, iyadoo Xamaas ay marar badan ku adkaysay inay doonayso dhammaan ciidamada Israel inay ka baxaan Gaza.

Wadahadalladan ayaa yimid kadib markii lagu dadaalay sidii loo soo afjari lahaa colaadda 14-bilood jirsatay. Ilo kale oo la socda xaaladda ayaa sheegay in Raysal Wasaaraha Israel Benjamin Netanyahu lagu wado inuu booqdo Qaahira si heshiiska loo dhammeystiro. Si kastaba ha ahaatee, xafiiska Netanyahu ayaa beeniyay inuu hadda joogo Qaahira, balse wadahadallada ayaa wali sii socda.

Saraakiil ka tirsan amniga Masar ayaa sheegay in rajada ay wanaagsan tahay isla markaana habeenkii Talaadada uu noqon doono mid go’aan laga gaaro qodobada harsan. Arrinta ugu muhiimsan ee doodda taagan ayaa ah dalabka Xamaas oo ah in heshiis horudhac ah uu horseedo xal buuxa oo dhammeystiran.

Dhinaca kale, saraakiil Maraykan ah ayaa sheegay in heshiiska lagu dhow yahay. John Kirby, la-taliyaha isgaarsiinta amniga qaranka ee Aqalka Cad, ayaa sheegay in Maraykanku aaminsan yahay in heshiisku soo dhowyahay balse ay weli ka digayaan in loo dhawaado heer la dhameystiro.

Bayaan kasoo baxay Xamaas Talaadadii ayaa lagu sheegay in heshiis la gaaro haddii Israel aysan keenin shuruudo cusub. Mas’uul sare oo Falastiini ah oo ka qayb qaadanaya wadahadallada ayaa sheegay in wadahadaladu marayaan marxalad go’aan qaadasho ah oo kama dambays ah.

Heshiiska la filayo ayaa lagu sheegay inuu yahay mid saddex waji ah, waxaana wajiga koowaad lagu sii deyn doonaa dadka rayidka ah iyo askarta dumarka ah ee wali ku xiran Gaza, halka sidoo kale la filayo in gargaarka bani’aadamnimo kor loo qaado.

Dhinaca dhulka Gaza, duqeymo xooggan oo ay fuliyeen ciidamada Israel ayaa la sheegay inay ku dhinteen qoysas isku wada nool. Ciidanka dhulka ayaa sidoo kale dhanka koonfurta u dhaqaaqay iyagoo gaaray xeebta, taas oo sababtay inay qoysas badan mar kale barakacaan.

Dhakhaatiirta Gaza ayaa sheegay in ugu yaraan 10 qof ay ku dhinteen duqeyn lala beegsaday guri ku yaalla xaafadda Daaraj ee magaalada Gaza. Dhanka waqooyi, Beit Lahiya oo ku hoos jirta go’doonka Israel tan iyo bishii Oktoobar, ugu yaraan 15 qof ayaa weli la la’yahay ama laga baqayaa inay ku hoos jiraan burburka guri saaka hore la duqeeyay.

Xaaladda bani’aadamnimo ee Gaza ayaa sii xumaanaysa iyadoo gargaarku gaari la’yahay dadka ay saameysay colaadda. Heshiiskan xabbad joojinta ayaa loo arkaa mid muhiim ah oo rajo u horseedi kara xasilooni iyo yareynta khasaaraha ka dhashay dagaalka.

GAROWE ONLINE