Imaaraadka oo ka digay tallaabo adag haddii weerarrada Iran sii socdaan

ABU DHABI — Wasiirka iskaashiga caalamiga ah ee Imaaraadka Carabta, Reem Al-Hashimi, ayaa sheegtay in dalkoodu qaadi karo tallaabooyin adag haddii Iran ay sii waddo weerarrada gantaallada iyo diyaaradaha aan duuliyaha lahayn ee lagu beegsanayo dhulka UAE.

Wareysi ay siisay CNN, ayay Al-Hashimi ku sheegtay in Imaaraadku diyaar u yahay inuu is difaaco, inkastoo ay rajeynayaan in xaaladdu halkaas gaari doonin.

“Waxaan diyaar u nahay inaan is difaacno. Waxaan rajeyneynaa inaanay arrintu halkaas gaadhin, balse ma fadhiyi doonno annagoo weli bartilmaameed u ah mowjadahan weerarrada ah,” ayay tiri.

Markii la weydiiyay suurtagalnimada tallaabo militari, ayay sheegtay in arrintaas ay weli furan tahay.

“Haddii ay sidaas noqoto, way noqon doontaa,” ayay tiri.

Waxay intaas ku dartay in hadda go’aanka uu gacanta ugu jiro Iran, iyadoo ugu baaqday inay si masuuliyad leh ula dhaqanto dal deris ah oo ay ku tilmaantay mid mar walba la shaqeyn jiray.

GAROWE ONLINE