Imran Khan: Ra'iisul Wasaaraha Pakistan oo laga helay Covid-19
-
WARIYAHA CAALAMKA GAROWE ONLINE
- Posted On 20-03-2021, 10:19AM
ISLAMABAD, Pakistan – Ra'iisul Wasaaraha dalka Pakistan, Imran Khan, ayaa laga helay safmareenka halista ah ee Coronavirus, sida uu Sabtida maanta ah ku dhawaaqay wasiirka caafimaadka waddankaas, Nausheen Hamid.
Sidda laga soo xigtay qoraal kasoo baxay xafiiska Ra'iisul Wasaaraha, Khan ayaa Khamiista todobaadkii hore waxaa uu qaatay talaalka Covid-19.
Pakistan ayaa kamid ah dalalka bilaabay in ay shacabkooda ka talaalaan Covid-19, iyaddoo mas'uuliyiinta ugu sareysay ay safka hore kaga jiraan qaadashadda talaalkaas.
Khan oo 68-sano jir ah ayaa saacado kadib markii la talaalay wuxuu dadweynaha Pakisan uu cod dheer kula dardaarmay in ay dardargeliyaan in ay u hogaan-samaan talooyinka caafimaad ee looga hortagayo caabuqa aadka u faafa.
War-saxaafadeedka xafiiska Khan ayaa lagu caddeeyay in wasiirka koowaad ee xukuumadda Islamabad uu haatan ku karantiilan yahay hoygiisa.
"Ra'iisul Wasaaruhu haatan xaaladiisa caafimaad waa mid degan, wuxuuna kusii shaqeyn doonan gurigiisa illaa caafimaadkiisa uu taam kasoo noqonaayo," ayaa lagu soo gabagabeeyay bayaankan oo lala wadaagay warbaahinta.
Kiisaska Coronavirus ee waddanka Pakistan ayaa maraya 623-kun, dadka soo kabanaya waxay sii cagageynayaan 580-kun, halka geerida ay kor-u-dhaafeyso 13-kun, sidda ku xusan warbixintii u dambeysay ee Waaxda Caafimaadka.
GAROWE ONLINE
