Jay Clayton: Iran waxay diyaarisay qorshayaal ay ku beegsanayso ciidamada Mareykanka ee Bariga Dhexe

WASHINGTON - Qiimeyn sirdoon oo Mareykanku sameeyay ayaa muujinaya in qorshayaasha Iran ee lagu beegsanayo muwaadiniinta iyo ciidamada Mareykanka ee Bariga Dhexe ay gaareen heerar horumarsan, sida ay saraakiil Mareykan ah u sheegeen wargeyska The Wall Street Journal.

Digniintan ayaa lagu sheegay qoraal uu Jimcihii agaasimaha sirdoonka qaranka Mareykanka, Jay Clayton, u diray Xoghayaha Arrimaha Dibadda Marco Rubio.

Qoraalka ayaa lagu sheegay in Iran ay si weyn u kordhisay dadaallada ay ku beegsanayso shaqaalaha Mareykanka, iyadoo qorshayaasha weerarro halis ah ay gaareen heerar horumarsan gudaha Bariga Dhexe iyo dalal kale oo qaarkood.

Sida uu qoray The Wall Street Journal, shaqaale Mareykan ah ayaa laga daadgureeyay safaarado iyo saldhigyo ciidan, iyadoo shaqaalaha aan muhiimka ahayn lagu amray inay ka baxaan safaaradda Mareykanka ee Sacuudiga iyo dalal kale.

Sarkaal Mareykan ah ayaa wargeyska u sheegay in go’aannada daadgureynta ay qayb ahaan salka ku hayeen xogta ku saabsan qorshayaal weerarro oo looga shakisan yahay inay Iran abaabushay.

Warbixintan ayaa imaanaysa iyadoo hore loo soo tebiyay tallaabooyin amni oo la xiriira joogitaanka Mareykanka ee gobolka. NBC News ayaa 21-kii Oktoobar sheegtay in Mareykanku si hoose u dhimay tirada ciidamada ku sugan saldhigyo ku yaalla Urdun, Qatar iyo Kuwait, isla markaana uu yareeyay shaqaalaha qaar ka mid ah xarumaha diblomaasiyadeed.

Isla maalintaas, wariye Timour Azhari ayaa bartiisa bulshada ku qoray, isaga oo soo xiganaya saraakiil Mareykan ah, in Wasaaradda Arrimaha Dibadda ay diyaarinaysay amarro lagu dhimayo shaqaalaha safaaradaha ku yaalla dalalka Khaliijka.

Hase yeeshee, afhayeenka Wasaaradda Arrimaha Dibadda Mareykanka, Tommy Pigott, ayaa beeniyay warbixintaas, isaga oo sheegay in amarka bixitaanka uu khuseeyay Sacuudiga oo keliya. Waxa uu sidoo kale tallaabada ku xiriiriyay weerarrada Xuutiyiinta.

Dhanka kale, saraakiil Mareykan ah ayaa The Wall Street Journal u sheegay in Madaxweyne Donald Trump uu u janjeero inuu dib u bilaabo hawlgallo militari oo waaweyn. Si kastaba, wargeysku wuxuu sheegay inaan weli la gaarin go’aan kama dambays ah.

Haddii la xaqiijiyo, xogtan sirdoon waxay muujin kartaa koror ku yimid walaaca Washington ee ku aaddan khataraha ka dhanka ah shaqaalaheeda iyo ciidamada ku sugan Bariga Dhexe, xilli ay jirto cabsi laga qabo in xiisadaha gobolka ay mar kale isu beddelaan iska horimaad militari oo ballaaran.

GAROWE ONLINE