Kabul: hoteel dad ajaanib u badani ku sugnaayeen oo la weeraray
-
- Posted On 14-05-2015, 04:54AM
May 14, 2015 (GO)- Booliska dalka Afghanistan ayaa sheegay in ugu yaraan 11 qof ku geeriyoodeen weerar lagu soo qaadey hoteel ay ku sugnaayeen dad ajaanib u badan oo ku yaalla caasimadda Kabul.
Labo nin oo ku hubeysnaa qoryaha darandoorriga u dhaca iyo bumbooyin ayaa xoog ku galay hoteelka Palace Park Hotel oo xilligaas xafladi ka socotey, waxayna toogasho ku dileen qaar kamid ah ilaaladii iyo dadkii hoteelka deggenaa.
Is-rasaaseyn socotey muddo shan saac ah ayaa shex martey booliska sida gaarka ah u tababaran ee Afghanistan iyo dableydii weerarka soo qaaddey. Booliska ayaa markii dambe ku guuleystey inay xaaladda gacanta ku dhigaan kadib markii labadii nin ee weerarka soo qaadey ay is qarxiyeenn.
Af-hayeen u hadashay safaradda Maraykanka ee Kabul ayaa sheegtay in dadka weerarkaas lagu diley uu kamid ahaa qof haysta dhalashada Maraykanka.
Sidoo kale safaaradda India af-hayeen u hadlay ayaa sheegay in dadka weerarka khasaaruhu kasoo gaarey ay ku jireen qaar u dhashay India.
Mas'uuliyadda weerarka ilaa iyo hadda cidna ma sheegan, haseyeeshee ururka Taliban ayaa caan ku ah weerarrada uu la beegsado xarumaha dowladda Afghanistan iyo goobaha ay isugu yimaadaan ajaanibta u badan reer galbeedku.
GAROWE ONLINE
