Kenya oo xabsiga dhigtay dhakhtar Al-Shabaab looga shakiyay
-
- Posted On 17-10-2015, 10:54AM
17 Octobar, 2015(GO)-Ciidamada Booliska magaalada Marsabit ee dalka Kenya ayaa xabsiga dhigay dhakhtar lagu tuhunsan yahay inuu xubin ka yahay xoogaga Al-shabaab ee Somalia, laguna magacaabo Yaqub Cabdi Cumar oo 29-jir asal ahaan ka soo jeeda dalka Somalia.
Dhakhtarka xiritaankiisan ayaa ka dambeysay kadib markii uu booqday isbitaalka ku yaalla Marsabit County Referral, isagoo la socdaan koox dhalinyaro ah oo laga shaki qabo inay ka tirsan yihiin kooxda Al-shabaab.
Bernard Barasa oo ah madax barista danbiyada dagmadda Mersabet ayaa tilmaamay inay raadinayaan saddex ruux oo kale, kuwaas oo dhakhtarkan ku weheliyay booqashadiisa.
Mr Barasa waxa uu xusay in shakhsigani uu degen yahay magalada Nairobi dhowaanna ku soo laabtay Marsabit si waalidkiis u soo booqdo, isagoona sheegay kooxdaasi isaga la socotay inay weydiiyeen hooyooyinka ku umulay Isbitaalka magacyada u bixinayaan carruurtooda.
Kooxdan ayaa la sheegay in ay u ballanqaadeen waalidiinta inay ku soo laaban doonaan oo hadiyado u keenayaan kahor inta aysan qeybta bukaanka ragga u gudbin.
Xogag ka tirsan Al-Shabaab ayaa dalkaasi ka gaysta weeraro qorshaysan, waxaana xariga dakhtarku imaanaya xilli shalay ciidamada Kenya iyo kuwa Jubbaland soo furteen macalimad Isniintii laga afduubtay xeerada qaxootiga ee Xagardheer.
GAROWEONLINE
