Khilaaf hareeyay wadahalka Obama iyo Putin
-
- Posted On 29-09-2015, 11:27AM
29 September, 2015(GO)-Labada hogaamiye ee dalalka Maraykanka iyo Ruushka ayaa kulan ay uga hadlayeen xaaladda dalka Suuriya ku yeeshay magalada New ee dalka Maraykanka.
Obama iyo Putin ayaa ku hishiiyay in xal siyaasadeed lagu soo afjaro colaadda dalka Suuriya, basle waxa ay ku guuldareysteen in ay ku heshiiyaan waxa uu noqonaya mustaqbalka madaxweyne Bashaar Al-Asad.
Ruushka ayaa ku adkaysanaya inuu xoojinayo taageerada uu siinayo xukuumadda Asad, isla markaana uu duqayn doono goobaha ay ku suganyihiin waxa uu ugu yeeray Argagixiso.
Wuxuu tilmaamay Madaxweyne Putin inay ilaalin doonaan shuruucda caalamiga ah ee ku aadan duqaynta, balse aysan ku dayan doonin Maraykanka iyo xulafadiisa.
Hadal laga soo xigtay saraakiil Maraykan ah ayaa lagu sheegay in labada hogaamiye isku afgarteen amar la siiyo ciidamada labada dhinac ee ku sugan Suuriya si aysan ugu dhex dagaalamin.
Dalka Maraykanka iyo Ruushka ayaa si aad ah ugu kala aragti arrinta Suuriya, waxayna dhalisay in laga dareemo khudbadihii ay ka jeediyeen xarunta Qaramada Midoobay ee New York.
GAROWEONLINE
