Madaxda Masar, Jordan iyo France oo digniin adag u diray Yahuuda

Fariintan ayaa ku saabsan weerarka ay Israa'iil qorsheyneyso in ay ka fuliso magaalada Rafah.

DOOXA, Qadar - Hogaamiyayaasha Faransiiska, Masar iyo Urdun ayaa uga digay Israa’iil in weerarka Rafah uu yeelan doono “cawaaqib halis ah” waxayna ku booriyeen xabbad-joojin degdeg ah oo la sii daayo maxaabiista Xamaas.

"Weerarkan oo kale wuxuu keeni doonaa oo keliya dhimasho iyo silic badan, wuxuu sare u qaadi doonaa khatarta iyo cawaaqibka barakaca ballaaran ee dadka Gaza, waxayna khatar gelinaysaa fiditaanka gobolka,” Madaxweynaha Faransiiska Emmanuel Macron, Madaxweynaha Masar Abdel Fattah el-Sisi iyo Boqorka Urdun Cabdallaha II ayaa sidaasku qoray qoraal wadajir ah oo lagu daabacay dhowr wargeys.

Ra’iisul wasaaraha Israa’iil, Benjamin Netanyahu, ayaa sheegay in la qabtay taariikh ay ciidamadooda u diri lahaayeen magaalada Rafah ee koonfurta Qaza halkaas oo ay gabaad ku yihiin 1.4 milyan oo Falastiiniyiin ah. "Waxay dhici doontaa - waxaa jirta taariikh," Netanyahu ayaa yiri, isaga oo aan cayimin waqtiga.

Qoraalkooda, hogaamiyayaasha Faransiiska, Masar iyo Urdun waxay ku baaqeen "kordhin weyn" oo ah gargaarka loo oggolaaday Gaza. "Dagaalka Gaza iyo dhibaatada bini'aadantinimo ee ba'an ee ay geysanayso waa in hadda la soo afjaraa."

GAROWE ONLINE