Madaxweynaha Turkiga oo ka digay nacaybka Muslimiinta
-
- Posted On 19-11-2015, 04:41PM
19 November, 2015(GO)-Madaxweynaha Turkiga ayaa sheegay in weeraradii Paris ay dhiiri gelinayaan naceybka ka dhanka ah muslimiinta iyo qaxootiga ku sugan, waxaana uu hogaamiyayaasha ugu baaqay inay adeegsadaan dareen guud.
Sida ay qortay wakaaladda wararka ee AP, Recep Tayyip Erdogan ayaa khamiista sheegay inay jiraan weeraro ka dhan ah muslimiinta iyo mowqif adag oo laga qaadanayo qaxootiga, kadib weeraradii Paris.
Waxa uu sheegay in ficilladan cusub ay sii qota dheereynayaan un musiibadii horey u jirtay.
“Haddii aynaan ka hortagin weerarada isir naceybka ku saleysan iyo dhaqdhaqaaqyada waalida ah, qatar iyo musiibo cusub waa lama huraan, isir naceybka iyo caddaawadda ka dhanka ah muslimiinta waa qatarta ugu xooggan” ayuu yiri Erdogan.
Hoggaamiyaha Turkiga waxa uu sheegay in muslim ahaan uu cambaareynayo weeraradii Paris ee ay fulisay kooxda Daacish, waxaana uu ugu baaqay muslimiinta kale inay cambaareeyaan.
Xigasho: VOA
