Mareykanka iyo Iiraan oo ku kala tagay wadahadalladii Islamabad

Wadahadallo socday ku dhowaad hal maalin oo buuxda ayaa ku soo dhammaaday is afgaranwaa, kadib markii wafdiga Maraykanka uu ka baxay miiska wada-xaajoodka isaga oo wata dalab ay ku tilmaameen kii ugu dambeeyay uguna cad.

Madaxweyne ku-xigeenka J.D. Vance ayaa sheegay in Maraykanku uu si daacad ah uga qayb galay wadahadallada, balse ugu dambeyn ay soo bandhigeen qorshe cad oo ah “dalabkii ugu dambeeyay” ee ay Iiraan ka sugayaan inay aqbasho.

Wuxuu tilmaamay in intii ay socdeen 21-ka saacadood ee wada-hadallada, ay si joogto ah ula xiriireen Madaxweynaha Donald Trump, kaas oo ku dhiirrigeliyay inay dadaal buuxa sameeyaan si heshiis loo gaaro. Si kastaba ha ahaatee, dadaalladaasi ma aysan dhalin wax horumar ah.

Vance ayaa caddeeyay in Maraykanku si faahfaahsan u qeexay waxa uu u arko xuduudihiisa cas iyo meelaha uu diyaar u yahay inuu ka tanaasulo, balse dhinaca Iiraan aysan weli muujin go’aan cad oo ay kaga tanaasulayso horumarinta hubka nukliyeerka mustaqbalka fog.

Wuxuu hoosta ka xarriiqay in heshiis kasta uu ku xirnaan doono dammaanad buuxda oo laga helo Iiraan, taas oo xaqiijinaysa inaysan waligeed horumarin doonin hubka nukliyeerka—ma aha oo kaliya hadda, balse muddo dheer.

Dhanka kale, dhaqdhaqaaqyada badda ee marinka istiraatiijiga ah ee Strait of Hormuz ayaa sii xoogeysanaya. Subaxnimadii maanta, ugu yaraan 16 markab ayaa maray marinkan, taas oo ka dhigeysa mid ka mid ah maalmaha ugu mashquulka badan tan iyo markii la gaaray xabbad-joojin hore.

Ciidamada Maraykanka ayaa sidoo kale qaaday tallaabooyin militari oo badeed, iyadoo laba markab dagaal oo hagaya gantaallada ay bilaabeen hawlgallo lagu sifeynayo miinooyin la sheegay in hore loogu aasay marinka. Qaar ka mid ah maraakiibta shidaalka qaada ayaa sidoo kale loo oggolaaday inay si nabad ah uga gudbaan marinka, iyagoo ka kala socday Shiinaha, Hong Kong iyo Liberia.

Xaaladda ayaa weli ah mid kacsan, iyadoo indhaha caalamku ay ku sii jeedaan go’aanka ay Iiraan ka qaadan doonto dalabka ugu dambeeya ee Maraykanka.

GAROWE ONLINE