Mareykanka oo ka digay ku xadgudubka xuquuqul insaanka

WASHINGTON, USA – Ma jiro dal laga aqbalayo in uu ku tuntay xuquuqda aadanaha ama xuquuqaadka aas-aasiga ah iyadda oo qiil laga dhiganayo Covid-19, sidda uu cod dheer uga digtay dowladda Mareykanka.

Inkasta oo uusan soo bandhigin talaabada ay qaadayaan, wasiirka arrimaha dibadda Mareykanka, Antony Blinken, ayaa diray digniintan iyadda oo dalal ay ku jirto Soomaaliya laga soo warinayo xadgudubyo.

"Dalalka waa in lagula xisaabtamaa in ay dhaqan-geliyaan waajibaadkooda [ilaalinta] xuquuqda aadanaha. Waddanna marmarsiyo kama dhigan karo Covid-19 si uu ugu xadgudbo xuquuqul insaanka ama xorriyadda aas-aasiga ah," ayuu Blinken yiri isaga oo la hadlaya xubnaha baarlamaanka.

Washington ayaa kamid ah wadamadda sidda dhow ula socda xaalada Soomaaliya isla markaana saameynta ku leh go’aanadda masiiriga ah ee dhanka doorashooyinka oo khilaaf weyn uu ka taagan yahay.

Madaxwaynaha waqtiga ka dhamaadey Maxamed Cabdullaahi Farmaajo ayaa wajahaya eedeymo ku saabsan in uu ciidamadda u adeegsaday caburinta banaanbaxyaal si nabdoon fekerkooda ku muujinayey.

Falkaas oo dhacay Jimcadda todobaadkii lasoo dhaafay waxaa cambaareeyay Midowga Musharaxiinta oo xubno kamid ah ay ka qeybgaleen mudaaharaadka, waddamo waaweyn iyo urur ay Soomaaliya kamid tahay.

Musharaxiinta oo rasaasta lagu furay ku sifeeyay "fal-dambiyeed" iyo "isku day dil oo dhameystiran" ayaa ku goodiyey in ay ku dacweyn doonan Farmaajo oo qudhiisa haatan doonaya in uu taladda dalka sii joogo.

GAROWE ONLINE