Mareykanka oo qirtey duqeyn uu ku laayey dad shacab ah

Washington ayaa qoomamo ka muujisay dilkaas rayidkaas aan xiriirka la lahayn kooxaha argagixisada.

WASHINGTON, USA - General Frank McKenzie, oo ah madaxa taliska dhexe ee Mareykanka, ayaa qiray in weerar ay diyaaradaha aan duuliyaha lahayn ee Mareykanka ka fuliyeen caasimadda Afghanistan ee Kabul, dabayaaqadii bishii Ogosto lagu dilay 10 qof oo rayid ah, oo ay ku jiraan carruur.

McKenzie ayaa Jimcihii sheegay in “aysan dhici karin” in dadka la dilay ay xiriir la leeyihiin Dowladda Islaamiga ah ee Gobolka Khorasan, ISKP (ISIS-K), sida markii hore ay sheegteen ciidamada Mareykanka.

Jeneraalka Mareykanka ayaa “tacsi tiiraanyo leh” u diray qoysaska dhibbanayaasha, isagoo carrabka ku adkeeyay in weerarka lagu qaaday “si dhab ah loo rumeysan yahay” oo looga hortagayo weerar ku soo fool leh garoonka diyaaradaha oo ay ciidamada Mareykanku dadka ka daadgureynayeen.

Xoghayaha Difaaca Mareykanka Lloyd Austin ayaa ka tacsiyeeyay dhibbanayaashii weerarka Jimcihii wuxuuna ku dhawaaqay "dib -u -eegis dhab ah" oo ku saabsan baaritaanka weerarka oo sidoo kale tixgelin doona baahida loo qabo in la beddelo "mas'uuliyiinta ku shaqada lahayd dhacdadaas.

Duqeynta oo dhacday 29 -kii bishii Ogosto ayaa timid maalmo kadib markii qarax ismiidaamin ah oo ka dhacay meel u dhow garoonka diyaaradaha, oo ay sheegatay ISKP, ay ku dhinteen ugu yaraan 175 qof, oo ay ku jiraan 13 ka tirsan ciidamadda Mareykanka.

Mareykanka ayaa dhammaan ciidamadiisa kala baxay Afgaanistaan ​​dhammaadkii bishii hore markii Taliban ay la wareegeen talada waddanka, iyagoo qabsaday Kabul bartamihii bishii Ogosto.

Ciidamada Mareykanka, oo weli gacanta ku haya gegida dayuuradaha ee Kabul markii Talibanka ay la wareegeen gacan ku haynta caasimadda, ayaa sameeyay hawlgal daad-gureyn si ay u soo qaadaan muwaadiniinta Mareykanka, muwaadiniinta waddanka saddexaad iyo xulafada Afghanistan.

GAROWE ONLINE