Dagaalka Bariga Dhexe: Trump oo ugu hanjabay Iran weerar aan horey loo arag

WASHINGTON/DUBAI – Madaxweynaha Mareykanka Donald Trump ayaa hanjabaad xooggan u diray dowladda Iran, isagoo ballan-qaaday jawaab ciidan oo "heer aan horay loo arag" ah, haddii Tehran ay isku daydo inay miinooyin ku raddo marinka muhiimka ah ee Hormuz.

Howlgalka oo galay maalintiisii 11-aad, loona bixiyay "Operation Epic Fury", ayaa sababay khasaare ballaaran, iyadoo Mareykanku uu sheegay inuu ilaa hadda garaacay in ka badan 5,000 oo bartilmaameed gudaha Iran ah, isla markaana uu qubay 50 markab oo ay leeyihiin ciidanka badda ee Iran.

Dagaalka ayaa hadda ku baahay inta dalalka Khaliijka, iyadoo Iran ay qaadday weerarro ay ugu magac dartay "Operation True Promise 4". Xaaladda dalalkaas ayaa ah mid kacsan.

Qalabka difaaca cirka ayaa dhexda ka qabtay 17 diyaaradood oo bilaa duuliye ah iyo 12 gantaal. Weerarradan ayaa sababay dhimashada ugu yaraan 6 qof tan iyo markii uu dagaalku bilaawday.

Wasaaradda Difaaca ayaa xaqiijisay inay burburiyeen 7 gantaal oo lagu soo riday saldhigga cirka ee Prince Sultan iyo degaannada hodanka ku ah saliidda ee bariga dalka.

Kuwait iyo Bahrain waxay soo sheegeen weerarro lala beegsaday saldhigyo ciidan iyo dhismooyin rayid ah, taasoo keentay dhimasho iyo dhaawac.

Difaaca cirka ee Qatar ayaa ka hortagay 17 gantaal iyo 6 diyaaradood oo drones ah oo laga soo riday dhanka Iran.

Xirnaanshaha marinka Hormuz ayaa sababay in qiimaha shidaalka ee adduunka uu isbeddel xooggan ku yimaado. In kasta oo Trump uu sheegay in dagaalku "si dhakhso ah u dhammaan doono," haddana madaxda dalalka Khaliijka ayaa sheegay in Mareykanku uusan siin difaac ku filan, iyagoo ka baqaya in gobolku noqdo goob lagu kala baxo.

GAROWE ONLINE