Obama: Muuqaalka cunsuriyad ah wuxuu muujinayaa "Xishood la'aanta Trump"

WASHINGTON D.C. — Madaxweynihii hore ee Maraykanka, Barack Obama, ayaa si dadban uga jawaabay muuqaal cunsuriyad xambaarsan oo lagu baahiyay baraha bulshada ee Madaxweyne Donald Trump, isaga oo sheegay in "xishoodkii" iyo "sharafkii" lagu yaqaannay madaxda dadweynaha ay hadda lumeen.

Muuqaalkan laga carooday ayaa ka koobnaa qayb muujinaysa Obama iyo xaaskiisa Michelle oo loo ekaysiiyay "daanyeer", taas oo keentay dhaleecayn ballaaran oo uga timid xubnaha xisbiyada Dimuqraadiga iyo Jamhuuriga intaba.

Falcelinta Aqalka Cad iyo tirtirista muuqaalka

Aqalka Cad ayaa markii hore difaacay muuqaalka, iyaga oo ku sifeeyay falcelinta dadweynaha "caro macmal ah." Si kastaba ha ahaatee, markii dambe waxaa lagu eedeeyay mas'uuliyadda soo gelinta muuqaalkaas mid ka mid ah shaqaalaha, iyadoo gebi ahaanba laga tirtiray barta uu ku lahaa Trump.

Wareysiga Obama

Obama ayaa arrimahan kaga hadlay wareysi uu siiyay Brian Tyler Cohen oo caan ku ah barnaamijyada Podcast-yada. Cohen ayaa weydiiyay madaxweynihii ugu horreeyay ee madow ah ee soo mara Maraykanka aragtidiisa ku aaddan halka uu marayo xiriirka iyo hadallada siyaasadda, isagoo tusaale u soo qaatay qoraallada muranka dhaliyay ee Trump.

Obama ayaa tilmaamay in xeerarkii iyo anshaxii hore u hagi jiray hoggaamiyeyaasha ay hadda u muuqdaan kuwo meesha ka baxay, taas oo khatar ku ah hab-dhaqanka bulshada.

GAROWE ONLINE