Obama oo dhaliilay duqeymaha Israa’iil ee Qasa
-
GAROWE ONLINE XAFIISKA MUQDISHO
- Posted On 24-10-2023, 12:23PM
WASHINGTON - Madaxweynihii hore ee Mareykanka Barack Obama ayaa dhaliilay go’aanka Israa’iil ay ku go’doomisay Marinka Qasa, iyadoo ay ku guda jirto dagaalka Xamaas, isagoo ka digay cawaaqib xumada ka dhalan karta go’aankan.
Obama oo xilka madaxtinimada Maraykanka qabtay intii u dhaxaysay 2009 iyo 2017, ayaa yiri
“Go’aanka ay dawladda Israa’iil ku jartay cunnada, biyaha, iyo korontada kaliya ma ahan mid khatar ku ah inay uga sii darto dhibaatooyinka bini’aadantinimo, balse waxay sidoo kale horseedi kartaa inay Falastiniyiintu go’aan ka qaataan Israaiil, ayna fashil ku soo dhamadaan dadaaladda la isugu soo dhaweynaayo labada dhinac"
Waxa uu intaa ku daray in go’aankaasi uu sidoo kale horseedi karo in ay meesha ka baxdo taageerada caalamiga ah ee Israel, taas oo laga yaabo in ay ka faa’iidaystaan cadawga Israa’iil, isla markaana ay wiiqdo dadaallada muddada dheer lagu raadinayo nabadda iyo xasilloonida gobolka.
Xilligii Obama, Israa’iil ayaa laba dagaal ku qaadday Marinka Qasa sannadihii 2012 iyo 2014kii.
GAROWE ONLINE
