Qarax ka dhacay bannaanka maxkamadda sare ee Qaahira
-
- Posted On 03-03-2015, 06:08AM
March 3, 2015 (GO)- Ugu yaraan labo qof oo rayid ahaa ayaa ku dhintey sagaal kalena way ku dhaawacmeen qarax goor dambe oo shalay ahayd ka dhacay bannaanka hore ee maxkamadda sare ee magaalada Qaahira ee dalka Masar.
Dadka dhaawacmey oo qaarkood xaaladoodu halis tahay waxaa ku jira dhowr askari oo boolis ah.
Booliska ayaa xirey agagaarka goobta uu qaraxu ka dhacay, waxaana telefishinka dowladda laga baahiyey in kooxaha miino baarku halkaas ka heleen bam kale oo aan weli qarxin.
Goobta qaraxu ka dhacay ayaa ah meel aad u mashquul badan waxaana ku yaalla suuq dadka waratada ahi wax ku iibiyaan, goob basaska laga raaco iyo labo boosteejo oo kuwa tareenada ah.
Mas'uuliyadda weerarka waxaa sheegatay koox isku magacowdey (Kacdoonka Aargudashada). Kooxdaas ayaa kusoo qortey boggeeda Twitter-ka in bartilmaameedka weerarkaasi ahaa bar-kantarool oo ciidamo booliska ka tirsani ku sugnaayeen.
Weerarrada lala beegsanayo xarumaha dowladda ayaa kordhey laga soo bilaabo July 2013, markaasoo militeriga Masar xukunka kala wareegeen Madaxwweynihii la doortey ee Muxammad Mursi.
GAROWE ONLINE
