Qatar oo ku baaqday in la baaro beegsiga ay Israa’iiliyiintu ku haayaan Dugsiyada & Isbitaallada

DOHA (GO) - Dowladda Qatar ayaa ku baaqday baaritaan caalami ah oo degdeg ah oo lagu sameynaayo beegsiga joogtada ah ee Israa'iil ee dugsiyada iyo isbitaallada, ka dib markii Israa’iil ay duqaysay dugsiga Al-Fakhura ee waqooyiga Marinka Qasa.

Horaantii Sabtidii, dad badan oo Falastiiniyiin ah ayaa lagu dilay laguna dhaawacay duqeyn ay Israa’iil la beegsatay Iskuulka Al-Fakhura, oo xiriir la leh Hay’adda Qaramada Midoobay u qaabilsan gargaarka iyo qaxootiga ee UNRWA.

Wasaaradda arrimaha dibadda Qatar ayaa bayaan ay soo saartay ku tiri:

"Waxaan dalbaneynaa baaritaan caalami ah oo ay hogaaminayaan baarayaal madax-bannaan oo Qaramada Midoobay ka socda si ay u baaraan xaqiiqooyinka la xiriira beegsiga ciidamada Israa’iil ee dugsiyada iyo isbitaallada."

Wasaaraddu waxay sidoo kale cambaaraysay Duqeymaha Israa'iil ee ka dhanka ah Iskuulka Al-Fakhura ee ku yaala xerada Jabalia ee waqooyiga Qasa, kaas oo sababay dhimashada tobaneeyo, kuwaas oo u badan caruur iyo haween,"

"Waa xasuuq naxdin leh oo ka dhan ah dadka rayidka ah ee aan isdifaaci karin, iyo ku xad-gudub qaawan oo ka dhan ah mabaadi'da sharciga caalamiga ah ee bani'aadamnimada."

GAROWE ONLINE