Shiinaha oo xukun dil ah ku fuliyay 4 Muwaadin oo u dhashay Canada

Ottawa, Canada – Shiinaha ayaa xukun dil ah ku fuliyay afar muwaadin oo u dhashay Canada, oo lagu eedeeyay dambiyo la xiriira daroogo, iyadoo dowladda Canada ay marar badan dalbatay in loo naxariisto, sida ay sheegtay Wasaaradda Arrimaha Dibadda ee dalkaas.

Wasiirka Arrimaha Dibadda ee Canada, Melanie Joly, ayaa sheegtay in ay “si xooggan u cambaareyneyso” dilalkan, waxaana ay cadeysay in iyada iyo Ra’iisul wasaarihii hore, Justin Trudeau, ay codsadeen in loo bedelo xabsi kiiskooda.

Afhayeenka Arrimaha Caalamiga ee Canada, Charlotte MacLeod, ayaa sidoo kale sheegtay in Ottawa ay sii wadi doonto bixinta taageero qunsuliyadeed oo qoysaska siinayso, isla markaana ay "si adag uga soo horjeeddo isticmaalka xukunka dilka kiiskasta, meel kasta."

Inkastoo dilalka muwaadiniinta reer galbeedka ee Shiinaha ay yihiin kuwo aan sidaas u badnayn, afarta muwaadiniin ee Canadian ah waxay sidoo kale ahaayeen muwaadiniin asalkooda u dhashay Shiinaha.

Safaaradda Shiinaha ee Ottawa ayaa sheegtay in afarta muwaadiniin ay heleen maxkamad cadaalad ah iyo geedi socod sharci ah oo ku saleysan “si buuxda sharciga.”

GAROWE ONLINE