Siyaasi caan ahaa kana tirsanaa mucaaradka Russia oo Moscow lagu diley
-
- Posted On 28-02-2015, 05:27AM
February 28, 2015 (GO)- Siyaasi caan ahaa kana tirsanaa mucaaradka dalka Russia ayaa lagu diley bartamaha magaalada Moscow.
Dabley hubeysan oo gaari watey kuwaasoo aan ilaa iyo hadda haybtooda la aqoonsan ayaa lagu soo warramayaa inay toogteen mas'uulkaas oo lagu magacaabi jirey Boris Nemtsov.
Nemtsov ayaa si aad ah u dhaliili jirey siyaasadda Madaxweyne Vladimir Putin wuxuuna maalinta Axadda ka qayb geli lahaa dibadbax ballaaran oo looga soo horjeedo dowladda kaasoo la qorsheynayey inuu ka dhaco magaalada Moscow.
Af-hayeen u hadashay Wasaaradda Arimaha Gudaha Russia oo lagu magacaabo Yelena Alekseyeva ayaa sheegtay in la baarayo sababta dilka iyo weliba cidda ka dambeysey.
Waxay sidoo kale sheegtay in sirdoonku su'aalo weydiinayaan haweeney u dhalatay dalka Ukraine oo xilligii Boris Nemtsov la dilayey la socotey.
Mr Nemtsov ayaa horay xilal kala duwan usoo qabtey waxaana kamid ah ra'isal wasaare ku-xigeen, xildhibaan barlamanka ka tirsan iyo guddoomiyaha gobolka Nizhny Novgorod.
GAROWE ONLINE
