Sudan: 18 xisbi oo ka baxay wada-xaajoodkii dowlada
-
- Posted On 21-01-2015, 04:02AM
January 21, 2015 (GO)- Inta badan axsaabta siyaasadda dalka Sudan ayaa ka baxay wadahadalkii mudada sanadka ka badan u socdey dowlada iyo mucaaradka iyagoo sidoo kale sheegay inay qaadaceen doorashada la qorsheynayo inay dhowaan dalkaas ka dhacdo.
18 xisbi oo kamid ah 21ka xisbi ee mucaaradka ayaa go'aankaas si wadajir ah qalinka ugu duugey, iyagoo sabab uga dhigay in xukuumadda al-Bashiir weli sii wado caburiska ay ku hayso mucaaradka islamarkaana diidan tahay inay sii deyso maxaabiista siyaasadda ee boqollaalka tiradoodu kor u dhaafeyso.
" waxaan go'aan ku gaarney inaan ka baxno wadaxaajoodka waxaana ugu wacan in Madaxweyne al-Bashiir diidey sii deynta maxaabiista siyaasadeed iyo weliba xoriyatul qowlka siyaasiyiinta" sidaas waxaa yiri Hassan Osman Rizk oo ah guddoomiyaha xisbiga Reform Now party.
Madaxweynaha Sudan ayaa bishii January ee sanadkii hore ku baaqay shirweyne qaran oo ay kasoo qayb galeen dhammaan axsaabta mucaaradku, si looga tashado aayaha dalka is-af-garadna looga gaaro khilaafaadka siyaasadeed ee jira.
Dadka ka faalooda siyaasadda dalka Sudan ayaa ku tilmaamay go'aanka axsaabta siyaasadu qaateen mid dhabar jab ku noqon doona qorshihii Madaxweyne al-Bashiir oo isagu xukunka afgembi militeri ku qabsadey, dalkaasna soo hoggaaminayey muddo 25 sano ka badan.
GAROWE ONLINE
