Tirada muwaadiniinta Maraykanka ee ku sugan Sudan oo la shaaciyay
-
WARIYAHA CAALAMKA GAROWE ONLINE
- Posted On 26-04-2023, 05:26AM
KHARTUUM, Suudaan - Tira-koobyadda soo baxaya ayaa sheegaya in ay Suudaan ku sugan yihiin xiligaan in ka badan 16 kun oo ah muwaadiniinta haysta dhalashadda Maraykanka, sidda ay muujinayaan warbixino ay qortay saxaafadda.
Dadkaan ayaa, sidda ay saxaafadda warisay, waxay badankoodu asal ahaan kasoo jeeda Suudaan iyaga oo laga soo sheegay qaybtood in aanay doorbidayn in ay xiligaan Suudaan ka baxaan.
Caasimada oo kaliya ma joogaan muwaadiniinta Maraykanka ee asal ahaan Suudaaneeska ah ee waxaa ay ku kala sugan yihiin dhamaan gobaladda dalka Suudaan.
Wasaaradda Arimaha Dibadda Maraykanka ayaa sanadihii lasoo dhaafay marar kala duwan u dirtay digniino muwaadiniinta in aysan isaga safrin Suudaan.
La taliyaha amniga qaranka ee Maraykanka, Jacob Sullivan, ayaa sheegay in aysan xiligaan ciidamo nabad ilaalin ah u dirayn Suudaan balse oo kaliya uu Maraykanku sugan doono amniga safaaradiisa.
Maraykanka ayaa ku doodaya in illaa uu dagaalku joogsado ama uu garoonka diyaaradaha ee Khartoum furmo in aanay samayn karin hawlaha daad-gureynta ah.
Afhayeen u hadashay Aqalka Cad, Karine Jean-Pierre ayaa tiri: "Wax iska caadi ah ma ahan in laga soo daad-gureeyo dibada muwaadiniinta Maraykanka ah laakiin hadii arintaas laga fursan waayo ciidamadu Maraykanku waa u diyaar fulintiisa".
GAROWE ONLINE
