Tiradda Israa'iil ay ku dishay Gaza oo kor u dhaaftay 30,000 qof

Dhanka kale, cisbitaalka kaliya ee ka shaqeeya waqooyiga Gaza ayaa joojiyay shaqada shidaal yaraan awgeed.

DOOXA, Qadar - Wasaaradda caafimaadka ee Gaza ayaa sheegtay in tirada dadka ku dhintay dhulka Falastiiniyiinta ee dagaalka Israa’iil ay ka wado dhulkaasi ay kor u dhaaftay 30,000 oo qof.

"Tirada Shuhadadu waxay ka badan tahay 30,000," ayaa lagu yiri bayaanka wasaaradda. Waxay intaas ku dartay in dhimashadu ay ku jirto ugu yaraan 79 dhimasho ah oo la soo sheegay hal habeen.

Dhanka kale, cisbitaalka kaliya ee ka shaqeeya waqooyiga Gaza ayaa joojiyay shaqada shidaal yaraan awgeed, taasoo ka dhigtay dadka deegaanka inay ka maqan yihiin adeegyada daryeelka caafimaadka ee muhiimka ah.

Warbixin ay soo saartay wasaaradda caafimaadka ee fadhigeedu yahay magaalada duqeymaha ku socdaan ee Gaza ayaa lagu sheegay in isbitaalka Kamaal Adwan la xiray.

War saxaafadeedka ayaa lagu caddeeyay in gabi ahaanba uu istaagay dhaq dhaqaaqii isbitaalka kadib shidaal la’aan iyo matoorrada oo aan shaqeyn karin.

"Dadka deggan gobolka ma heli karaan adeegyada sifaynta kiliyaha, daryeelka degdegga ah, daryeelka carruurta, daawaynta gudaha, daryeelka wadnaha, qalliinka guud iyo adeegyada degdegga ah ee habeen iyo maalinba," ayay tiri.

Israa’iil ayaa go’doomin curyaamin ah ku soo rogtay Qaza, taasoo keentay in dadkeeda ay qarka u saaran yihiin macaluul, gaar ahaan dadka deggan waqooyiga magaaladda oo xaaladda ku adag tahay.

GAROWE ONLINE