Tony Blair oo qeyb ka ahaa duulaankii Iraq oo laga dhigayo madaxa maamul laga dhisayo Gaza

GAZA – Ururka Falastiiniyiinta ee Hamas ayaa Axaddii sheegay in Ra’iisul Wasaarihii hore ee Britain, Tony Blair, uu yahay “shakhsiga aan laga rabin arimaha Falastiin,” iyagoo carrabka ku adkeeyay inaysan jirin wax soo jeedin rasmi ah oo ku saabsan xabad-joojin laga helay dhexdhexaadiyayaal ku saabsan dagaalka ka socda Marinka Gaza.

Hadalkaas ayaa waxaa bartiisa Telegram-ka ku baahiyay Husam Badran, oo ka tirsan Xafiiska Siyaasadda Sare ee Hamas.

Hadalkan ayaa yimid kadib warbixin ay daabacday wargeyska Haaretz ee Israa’iil, oo soo xiganaya ilo siyaasadeed Carbeed, taasoo sheegtay in maamulka Mareykanka uu qorsheynayo in Blair loo magacaabo madaxa maamul ku-meel gaar ah oo laga dhiso Gaza.

Badran ayaa sheegay in Blair lagu xiro qorshe kasta oo la xiriira maamulka Gaza ay tahay "astaamo xun" oo u keeni kara dhibaato shacabka Falastiiniyiinta, isagoo ku tilmaamay Blair "shakhsiga taban oo mudan in maxkamado caalami ah la soo taago, gaar ahaan doorkiisii dagaalkii Ciraaq (2003–2011).”

Wuxuu intaas ku daray in Blair uu yahay “walaalka Shaydaanka,” isla markaana “uusan wax kheyr ah u keenin qadiyadda Falastiiniyiinta, Carabta iyo Muslimiinta guud ahaan, doorkiisuna uu ahaa mid dambiile ah oo burbur horseeday.”

Badran ayaa carabka ku adkeeyay in maaraynta arrimaha gudaha ee Gaza ama Daanta Galbeed ay tahay “arrin Falastiini ah oo u baahan heshiis qaran, balse aan laga keeni karin dibadda ama lagu soo rogi karin shacabka.”

“Shacabka Falastiin waxay awood u leeyihiin inay iskood isu maamulaan; waxaan leenahay khibrad iyo kheyraad aan ku xiri karno gobolka iyo caalamkaba,” ayuu yidhi.

Sidoo kale, wuxuu sheegay in tan iyo bishii December 2023, hoggaanka Hamas uu go’aan rasmi ah gaaray – kaasoo lala wadaagay kooxaha Falastiiniyiinta kale iyo dowlado saaxiib ah – inaysan rabin inay kaligood sii maamulaan Gaza, xitaa ka hor intaanay colaadda xooggan dib u qarxin.

Badran ayaa sheegay in aysan jirin wax soo jeedin rasmi ah oo ku saabsan xabad joojin oo laga helay dhinaca dhexdhexaadiyaasha, kuwaas oo ah waddada caadiga ah ee noocaas ah.