Trump: “Iran iyo Israel way jebiyeen Xabad-joojintii”
-
GAROWE ONLINE
- Posted On 24-06-2025, 11:15AM
WASHINGTON, D.C. — Madaxweyne Donald Trump ayaa Talaadadii si cad u dhaliilay Israel iyo Iran, isagoo sheegay inay labadooduba jebiyeen xabad-joojin uu ku dhawaaqay saacado yar kahor, balse wuxuu si gaar ah uga carooday Israel oo uu ku eedeeyay inay si xad dhaaf ah u weerartay.
Trump oo la hadlayay wariyeyaasha kahor inta uusan ka dhoofin saldhigga milatari ee Joint Base Andrews, isagoo u socday shir madaxeedka NATO ee magaalada The Hague, ayaa yiri: “Labada dhinacba way jebiyeen xabad-joojinta, balse Israel si buuxda ayay u weerartay. Arrintaasi ma aheyn mid wanaagsan.”
Madaxweynaha ayaa sheegay inuu rajeynayay in xabbad-joojin la ilaaliyo, isagoo tilmaamay in Iran ay sameysay waxyaabo khaldan, “laakiin Israel waxay si toos ah ugu degtay weerar aan loo baahnayn,” ayuu yiri.
Xabbad-joojin uu Trump ku dhawaaqay fiidnimadii Isniinta ayaa timid iyadoo caalamku ku baaqayay in la dejiyo xiisadda ka sii dareysa Bariga Dhexe. Si kastaba, faahfaahin rasmi ah lagama bixin heshiiska, waxaana muuqata in labada dhinac aysan si rasmi ah uga qayb qaadan.
Hadallada Trump ayaa si weyn u soo jiitay dareenka bulshada caalamka, maadaama ay tahay mar aan caadi ahayn oo uu madaxweyne Mareykan ah si toos ah u dhaleeceeyo Israel — gaar ahaan xukuumadda Benjamin Netanyahu oo uu Trump xiriir dhow la lahaa intii uu xilka hayay.
Markii la weydiiyay in uu la hadlay madaxda Israel ama Iran kadib jebinta xabad-joojinta, Trump wuxuu sheegay inuusan faahfaahin karin, balse intaas ku daray: “Wadahadallo way socdaan. Nabadda ayaan dooneynaa, laakiin nabad lama helayo haddii labada dhinac aysan daacad ka ahayn.”
Ilo madax bannaan iyo warbaahinta maxalliga ah ayaa sheegay in dagaallo goos-goos ah ay socdeen ilaa fiidkii Talaadada, taasoo muujineysa in xaaladda dhabta ah ee dhulka aysan weli deganeyn.
Wasaaradda Difaaca Mareykanka iyo Waaxda Arrimaha Dibadda ayaan weli si rasmi ah uga hadlin jebinta xabad-joojinta, halka Aqalka Cad uu si taxaddar leh uga gaabsaday qorshaha xiga.
GAROWE ONLINE
