Trump Oo Dimuqraadiga Ku Eedeeyay Shilka Diyaaradeed Ee Potomac River

Washington, DC – Madaxweynaha Mareykanka Donald Trump ayaa Khamiistii si aan caddeyn loo hayn ugu eedeeyay siyaasadaha maamulladii hore ee Dimuqraadiga shilkii diyaaradeed ee dhimashada badan sababay, kaasoo habeenkii Arbacada ka dhacay Potomac River.

“Waa in aan hayno kaliya shaqaale tayadoodu sareyso oo ka shaqeeya nidaamkeena duulista,” ayuu Trump yiri. “Anigu waxaan beddelay xeerarkii Obama, kuwaasoo aan ugu yaraan ahaa kuwo dhexdhexaad ah, una beddelay kuwo heer sare ah.”

Trump oo hadalkiisa sii wata, ayaa xusay in xilligii uu xilka hayay uu sare u qaaday heerka shuruudaha loogu xulo shaqaalaha hagista duulista.

“Waa inaad xasuusataan taas. Kaliya shaqaalaha ugu caqliga badan iyo kuwa maskax ahaan sareeya ayaa loo oggolaan jiray inay u qalmaan shaqada hagista diyaaradaha. Ka hor intaanan imaan, taasi ma jirin.” 

Trump ayaa sidoo kale eedeyntiisa ku daray in isbeddelka uu sameeyay xilligii uu xilka hayay dib loogu celiyay heerkii hoose kaddib markii uu ka tagay xafiiska, xilligii Biden la wareegay xukunka.

“Markii aan imid 2016, waxaan wax ka beddelay arrintaas si degdeg ah, sababtoo ah mar walba waxaan aaminsanaa in tani ay tahay shaqo ay tahay in ay qabtaan dad aad u caqli badan. Balse taas ma aanan haysan, ka dib waan helnay. Markii aan xafiiska ka tagay oo Biden yimid, wuxuu wax walba u celiyay heer ka hooseeya sidii hore,” ayuu Trump ku andacooday.

Trump wuxuu ku tilmaamay siyaasadaha xukuumadda Biden kuwo liita, isagoo intaa raaciyay: “Siyaasadoodu waxay ahaayeen kuwo xun, balse siyaasadahooda xisbiga Dimuqraadiga waxay ahaayeen kuwa kasii xun.”

Trump Oo Si Gaar Ah U Weeraray Pete Buttigieg

Trump wuxuu weerar afka ah ku qaaday Pete Buttigieg, oo ahaa xoghayaha gaadiidka xilligii Biden.

“Wuxuu ahaa masiibo,” ayuu Trump ku yiri Buttigieg, oo horey u soo noqday duqa magaalada South Bend ee gobolka Indiana. “Masiibo ayuu ahaa xilligii uu duqa magaalada ahaa, wuxuu burburiyay magaaladiisa, wuxuuna hadda masiibo ku yahay xafiiska dowladda.”

Trump wuxuu intaa ku daray in Buttigieg “uu burburiyay waaxda gaadiidka,” isagoo ku eedeeyay in uu xoogga saaray siyaasadaha kala-duwanaanta jinsiyadeed halkii uu hagaajin lahaa nidaamka duulista.

GAROWE ONLINE