Trump oo kumannaan Itoobiyaan ah kasoo tarxiilaya dalka Mareykanka

BOSTON, Mareykanka — Garsoore federaal ah oo Mareykan ah ayaa oggolaaday in maamulka Madaxweyne Donald Trump uu soo afjaro ilaalinta ku-meelgaarka ah ee masaafurinta ee in ka badan 5,000 oo Itoobiyaan ah oo ku nool Mareykanka.

Go’aanka ayaa ka dhigan in Itoobiyaankaasi ay lumin karaan Temporary Protected Status (TPS), oo ah xaalad sharci oo u oggolaanaysay inay si ku-meelgaar ah ugu noolaadaan kuna shaqeeyaan Mareykanka, iyadoo laga ilaalinayay masaafurin. 

Garsoore Brian Murphy oo ka tirsan maxkamadda federaalka ee Boston ayaa qaaday xannibaaddii maxkamadeed ee hor istaagtay Wasaaradda Amniga Gudaha Mareykanka inay joojiso TPS-ka Itoobiyaanka. Go’aanka ayaa yimid kaddib markii Maxkamadda Sare ee Mareykanka bishii Juun ay xaddiday awoodda maxkamadaha hoose ee ay ku hakinin karaan tallaabooyinka maamulka Trump ee lagu joojinayo TPS.

TPS-ka Itoobiyaanka waxaa markii ugu horreysay la bixiyay xilligii madaxweynihii hore Joe Biden sannadkii 2022, iyadoo lagu saleeyay colaadaha iyo xaaladda bani’aadantinimo ee Itoobiya. Dowladda Trump ayaa bishii Diseembar ku dhawaaqday inay joojinayso ilaalintaas, iyadoo sheegtay in xaaladaha Itoobiya aysan hadda keenayn khatar weyn oo ku wajahan dadka dib loogu celinayo dalka.

Ururrada u dooda xuquuqda muhaajiriinta ayaa si adag uga hor yimid go’aanka. Diana Konaté oo ka tirsan African Communities Together ayaa sheegtay in colaadda iyo xaaladda bani’aadantinimo ee Itoobiya ay weli taagan yihiin, isla markaana go’aanku khatar gelinayo kumannaan Itoobiyaan ah oo ku nool Mareykanka.

Si kastaba, dacwadda sharci ee Itoobiyaanka ayaa weli furan, iyadoo garsooruhu oggolaaday in la sii baaro eedeymaha sheegaya in go’aanka lagu joojiyay TPS-ka uu ku salaysnaa takoor la xiriira jinsiyad ama asal qaran. 

GAROWE ONLINE