Weerarkii lagu Qaaday Qunsuliyadda Imaaraadka ee dalka Iraq

RIYADH – Wasaaradda Arrimaha Dibadda ee Sacuudi Carabiya ayaa soo saartay cambaareyn kulul oo ku aaddan weerar dhanka cirka ah oo loo adeegsaday diyaaradaha aan duuliyaha lahayn (drones), kaas oo lagu beegsaday Qunsuliyadda Guud ee Imaaraadka Carabta oo ku taal magaalada Erbil ee xarunta Gobolka Kurdistanka Ciraaq.

Qoraal rasmi ah oo ka soo baxay wasaaradda ayay ku tilmaameen weerarkan inuu yahay "ku xad-gudub cad" oo lagu sameeyay xeerarka caalamiga ah iyo xasaanadda diblomaasiyadeed.

Weerarkan oo dhacay aroornimadii hore ee Talaadada, 10-ka Maarso, 2026, ayaa sababay burbur soo gaaray dhismaha qunsuliyadda, inkastoo aan la soo sheegin wax khasaare nafo ah.

Weerarkan ayaa imaanaya xilli gobolka uu ku jiro xaalad dagaal oo aad u kacsan tan iyo markii ay bilowdeen hawlgallada Mareykanka iyo Israa'iil ee ka dhanka ah Iiraan (Operation Epic Fury) 28-kii Febraayo.

Iiraan ayaa qaadday mowjado weeraro ah oo ay ugu magac dartay "aargoosi" kuwaas oo lagu beegsanayo waddamada Khaliijka ee martigeliya saldhiggyada ciidanka Mareykanka.

Beegsiga Saldhigyada: Iiraan ayaa gantaallo iyo diyaarado drones ah ku weerartay saldhigga Al Dhafra ee Imaaraadka iyo Al Udeid ee Qatar, iyadoo ku doodaysa in saldhigyadaas laga soo qaaday weerarada lagu hayo dhulkeeda.

Khasaaraha Imaaraadka: Tan iyo markii uu dagaalku billowday, Imaaraadka ayaa sheegay in lagu soo riday in ka badan 1,400 oo drones iyo boqolaal gantaal, kuwaas oo geystay dhimashada dad rayid ah iyo burbur hantiyeed oo ka dhacay magaalooyinka Abu Dhabi iyo Dubai.

Sacuudi Carabiya: Iiraan ayaa sidoo kale bartilmaameedsatay goobaha saliidda ee Sacuudiga sida Shaybah iyo saldhigga cirka ee Prince Sultan, halkaas oo uu ku dhintay askari Mareykan ah horraantii bishan.

Cabsida Gobolka: Waddamada Khaliijka ayaa ku adkaysanaya inaysan qayb ka ahayn dagaalka, balkan ay Iiraan si "sharci darro ah" u beegsanayso xarumahooda muhiimka ah iyo dublamaasiyiintooda.

Dowladda Australia ayaa dhankeeda ku dhawaaqday inay gantaallo iyo diyaarado difaac u soo dirtay Imaaraadka si ay uga caawiso kahortagga weerarada joogtada ah ee kaga imaanaya dhanka Iiraan.

GAROWE ONLINE