Xayiraada Trump ee baraha bulshada oo la kordhiyey

WASHINGTON, USA - Shirkadda Facebook ayaa kordhisay mudada xayiraada ciwaanka madaxweynihii hore ee Mareykanka Donald Trump iyo bartiisa Instagram, iyaddoo gaarsiisay illaa 7-dii Janaayo, 2023, waxaana ay sheegtay in "dib loo soo celin doono oo keliya haddii xaaladuhu saamaxaan".

5tii Maajo, guddiga kormeerka ee shirkadda ayaa taageeray hakinta Facebook ee cinwaanada Trump ee Facebook iyo Instagram sababta oo ah doorka la sheegay inuu ku lahaa rabshadaha dhismaha Capitol ee Jan. 6.

Dhamaadka muddadan, shirkaddu waxay dib u eegi doontaa haddii halista nabadgelyada guud ay hoos u dhacday iyo haddii ay go'aamiso inay weli jirto khatar weyn oo xagga amniga dadweynaha ah, waxay kordhin doonaan xaddidaadda waqti go'an, waxayna sii wadi doontaa dib-u-qiimeynta in halistaas ay gabi ahaanba meesha ka baxdey.

Guddigu wuxuu taageeray ganaaxa aan dhamaadka lahayn ee ay ku sheegeen Facebook "wuxuu ku guuldareystay inuu soo rogo ciqaab sax ah".

Madaxweynihii hore ayaa laga mamnuucay Twitter iyo Facebook kadib markii uu taageerayaashiisa ku booriyay inay "joojiyaan xatooyada," wuxuuna ugu yeeray "wadaniyiin waaweyn" intii lagu guda jiray kacdoonkii 6-dii Janaayo ee ka dhacay xarunta baarlamaanka Mareykanka.

Afar qof ayaa ku dhintay maalintaas xarunta Capitol, sarkaal boolis wuxuu ku geeryiidey maalintii ku xigtay ka dib markii uu ku dhacay laba istaroog. Laba sarkaal oo kale oo goobjoog ka ahaa intii rabshadu socotay ayaa is-diley wixii ka dambeeyay dhacdadaas.

Markii la mamnuucay baraha bulshada, wuxuu bilaabay aalad isgaarsiineed oo cusub oo loogu magac daray From the Desk of Donald J. Trump oo ay ku jiraan muuqaalo iyo hadalo uu bixiyay madaxweynihii hore laakiin Talaadadii afhayeenkiisa Jason Miller wuxuu sheegay in bogga la xiray sababo aan la shaacin.

GAROWE ONLINE